پاکپتن: گورنر پنجاب چوہدری محمد سرور کا کہنا ہے کہ 2 ماہ میں پورے پنجاب میں فلٹریشن پلانٹس شروع ہوں گے۔
تفصیلات کے مطابق پاکپتن میں گورنر پنجاب چوہدری محمد سرور نے تقریب سے خطاب کرتے ہوئے کہا کہ 600 کروڑ کی واٹر اسکیموں کا پی سی ون تیار ہوگیا۔
چوہدری محمد سرور کا کہنا تھا کہ 2 ماہ میں پورے پنجاب میں فلٹریشن پلانٹس شروع ہوں گے،فلٹریشن پلانٹس سے پینے کا صاف پانی میسر ہوگا۔
گورنر پنجاب نے کہا کہ کرونا کے حوالے سے حکومت کے فوری اقدامات کو پوری دنیا میں سراہا گیا ہے۔انہوں نے کہا کہ مستحقین کی مالی امداد میں کسی قسم کی سیاست شامل نہیں،یہ پیسےصرف اور صرف مستحقین کو دیےگئے۔
انہوں نے مزید کہا کہ بےروزگاری کے باعث ان کےگھروں کے چولہے بند تھے،10لاکھ خاندانوں میں راشن بیگ تقسیم کر چکے ہیں۔
اس سے قبل رواں ماہ 2 مئی کو گورنر پنجاب چوہدری محمد سرور نے وزیر اعظم عمران خان سے اسلام آباد میں ملاقات کی تھی جس میں انہوں نے وزیراعظم کو بتایا تھا کہ پنجاب آب پاک اتھارٹی کے بورڈ سمیت دیگر معاملات پر ہنگامی بنیادوں پر اقدامات کیے جا رہے ہیں۔
گورنر پنجاب کا کہنا تھا کہ پنجاب آب پاک اتھارٹی کے ذریعے ایک ایک پیسا پنجاب کے عوام کو پینے کے صاف پانی پر خرچ کیا جائے گا۔
