ایک لفظ آپ کی زندگی بدل سکتا ہے، جانیے کیسے؟ -
The news is by your side.

Advertisement

ایک لفظ آپ کی زندگی بدل سکتا ہے، جانیے کیسے؟

ونسٹن چرچل نے کہا تھا کہ ’تمام عظیم چیزیں سادہ ہیں، اور اکثر صرف ایک لفظ کے ذریعے بیان کی جا سکتی ہیں۔‘

ایک لفظ جو آپ کی زندگی کی درست طور پر نمائندگی کرتا ہے، جو آپ کی شخصیت کا رنگ ہے، نمائندہ ہے، جو آپ کی اپنے ہدف تک پہنچنے کے لیے مدد کرتا ہے، زندگی کے ہر قدم پر آپ کا ساتھ دیتا ہے، آپ کے ساتھ مسکراتا ہے اور آپ کے ساتھ روتا ہے۔

ایک لفظ ایسا ہوتا ہے جو ناکامی میں آپ کے ساتھ کھڑا ہو کر آپ کی حوصلہ افزائی کرتا ہے، آپ کو آگے بڑھنے کی ترغیب دیتا ہے۔

کینیڈین مصنف ایون کارمائیکل کی ایک شان دار کتاب ’آپ کا ایک لفظ‘ اس سلسلے میں تفصیل کے ساتھ وہ راز منکشف کرتی ہے جس کی مدد سے ایک کام یاب کاروبار اور کام یاب زندگی گزاری جا سکتی ہے۔

وہ کہتا ہے کہ ایک لفظ ایسا ہے جس سے یہ وضاحت ہو سکتی ہے کہ آپ کون ہیں۔ ہر شخص کا ایک لفظ ہوتا ہے، جس پر اس کی زندگی اور زندگی کی کام یابیوں کا انحصار ہوتا ہے۔ ایک ایسا لفظ جسے آپ اہم فیصلے کرنے کے لیے استعمال کرتے ہیں، جس کی آپ کو کچھ بڑا کرنے کے لیے ضرورت ہوتی ہے۔ ہمارے پاس اس کے دو اسباب ہیں:

پہلا سبب: ’آپ کا ایک لفظ‘ ترغیب کا مستحکم ذریعہ

آپ جب بھی کچھ بڑا کرتے ہیں اور پھر نتائج آپ کی توقع کے مطابق نہیں ہوتے تو آپ کو حوصلہ افزائی کی اشد ضرورت ہوتی ہے۔ یہ حوصلہ افزائی آپ کو وہی ایک لفظ فراہم کرتا ہے۔ آپ خود سے سوال کرتے ہیں کہ آپ جو کر رہے ہیں وہ کیوں کر رہے ہیں؟ یہ ایک لفظ اس سوال کے جواب میں مضمر ہوتا ہے۔

مثال کے طور پر ایک شخص نے آن لائن بزنس شروع کیا اور طویل اور تھکا دینے والی محنت کے بعد بھی بہت کم کما پایا، اس کو محسوس ہوا کہ وہ ناکام ہو گیا۔ تب اس نے یو ٹیوب پر کام یاب بزنس کے طریقے ڈھونڈے، لیکن دراصل اس کو صرف ایک درست لفظ کی ضرورت تھی۔

اس نے اس پر غور کیا اور اپنا ایک لفظ ڈھونڈ نکالا، یہ لفظ تھا ’یقین‘۔ اپنے کاروبار پر یقین، کہ وہ جو کر رہا ہے وہ ایک درست کاروبار ہے اور اس کاروبار سے پیسا کمایا جا سکتا ہے۔ اس کے بعد اس نے اپنے کاروبار کو از سرِنو ترتیب دیا اور کام یاب رہا۔

دوسرا سبب: ’آپ کا ایک لفظ‘ لوگوں کو آپ کے بارے میں بات کرنا آسان بنا دیتا ہے

یعنی ہمیں اس سلسلے میں بہت زیادہ واضح ہونا چاہیے کہ لوگ ہمارے بارے میں وہی جانیں جو ہم چاہتے ہیں۔

ایک ایسا لفظ جو لوگوں کو آپ کے بارے میں بات کرنا آسان بنا دیتا ہے، جو آپ کی شخصیت کی پہچان بن جاتا ہے۔ لیکن سوال یہ ہے کہ آپ اس لفظ کو کیسے تلاش کریں؟ تو خود سے تین سوال کریں۔

کاروبار کی مثال پر اسے اس طرح سمجھیں کہ آپ کے متوقع صارف کے پاس بہت سارے آپشنز ہیں تو وہ آپ ہی کا انتخاب کیوں کرے۔ یہاں ’رقم‘ اور ’منافع‘ جیسے الفاظ آپ کے کام نہیں آئیں گے بلکہ آپ کو کچھ الگ لے کر آنا ہوگا جو کسٹمرز کے ساتھ ایک جذباتی تعلق بن جائے۔ جب اسٹیو جابز نے ایپل کا آغاز کیا تو انھوں نے اپنے لیے لفظ Elegance کو چنا جو مارکیٹ میں دیگر کمپیوٹرز سے بالکل الگ تھا۔

لیکن سوال یہ ہے کہ آپ اپنا لفظ کیسے تلاش کریں۔ تو اس کے لیے خود سے یہ تین سوال کریں:

آپ کی پسندیدہ چیزیں کیا ہیں؟ شخصیت کی خصوصیات کیا ہیں؟ اور تبدیل نہ ہونے والے عناصر کیا ہیں؟

مثال کے طور پر آپ کی پسندیدہ کتابیں یا فلمیں کون سی ہیں اور ان میں قدرِ مشترک کیا ہے؟ آپ جن لوگوں کے ساتھ اٹھتے بیٹھتے ہیں یا وہ جن سے آپ کتراتے ہیں، ان کی شخصی خصوصیات کیا ہیں، اور ان میں کیا مشترک ہے اور کیا ایک دوسرے سے الگ؟ اور یہ کہ آپ کی زندگی میں جہاں تک آپ کو یاد ہے، کون سی دل چسپیاں موجود ہیں؟


یہ بھی پڑھیں:  اگر کوئی دوست پریشانی میں آپ سے مشورہ مانگے تو ان باتوں کا خیال رکھیں


پندرہ منٹ صرف کرکے آپ خود سے ان سوالات کے ذریعے وہ لفظ ڈھونڈ سکتے ہیں جس پر آپ کی زندگی کی کام یابیوں کا انحصار ہوتا ہے۔ اس مشق سے آپ کو کئی سارے الفاظ ملیں گے، آپ ان میں مشترک چیزیں تلاش کریں اور اس طرح اپنے ایک لفظ تک پہنچیں۔ وہ لفظ جو مشکل وقت میں آپ کی مدد کرتا ہے۔

Comments

comments

یہ بھی پڑھیں