The news is by your side.

Advertisement

حریت رہنماؤں کی قربانیاں رنگ لائیں گی، پاکستان کشمیر کے بغیر ادھورا ہے، فردوس عاشق

اسلام آباد : معاون خصوصی برائے اطلاعات فردوس عاشق اعوان نے کہا ہے کہ کشمیری حریت رہنماؤں کی قربانیاں رنگ لانے والی ہیں، پاکستان کا وجود کشمیر کے بغیر ادھورا ہے، بھارت کا مکروہ چہرہ دنیا کے سامنے آگیا۔

ان خیالات کا اظہار انہوں نے اسلام آباد میں یوم شہداء جموں کی تقریب سے خطاب کرتے ہوئے کیا۔ انہوں نے کہا کہ پاکستان و آزاد کشمیر کے عوام مقبوضہ کشمیریوں کے ساتھ ہیں، ہم کشمیری بہن بھائیوں کے دکھ درد کو محسوس کرتے ہیں، آج یوم شہدا جموں ہیں، ان کی قربانیوں سے یہ تحریک آزادی زندہ ہے۔

فردوس عاشق اعوان نے کہا کہ پاکستان کا وجود کشمیر کے بغیر ادھورا ہے، وزیراعظم عمران خان نے یو این جنرل اسمبلی سمیت ہر عالمی فورم پر کشمیر کا بھرپور مقدمہ لڑا ہے۔

وزیر اعظم نے اپنی تقریر میں دنیا میں بھارت کے مکروہ چہرے کو بےنقاب کیا، آج حکومت، پاک فوج اور پوری قوم کشمیریوں کی تحریک آزادی کےساتھ ہے۔

معاون خصوصی کا مزید کہنا تھا کہ آج پہلی مرتبہ عالمی میڈیا نے کشمیریوں پربھارتی مظالم کواجاگر کیا، عالمی برداری اورعالمی طاقتیں کشمیریوں کو ان کے حقوق دلانےمیں ناکام ہوئی ہیں، حکومت نے مؤثر سفارتکاری و میڈیا کےذریعے عالمی ضمیر کوجھنجھوڑنا ہے۔

فردوس عاشق اعوان نے شرکاء سے کہا کہ پاکستان اور حکومت کو آپ کی سپورٹ کی ضرورت ہے، آپ سوشل میڈیا کا استعمال زیادہ کریں اور کشمیریوں کی مدد کریں، آپ سب برہان الدین وانی بنیں۔

انہوں نے کہا کہ آج بھارت کا مکروہ چہرہ دنیا کے سامنے آگیا ہے، عالمی سطح پر مناسب حکمت عملی کی ضرورت ہے، حریت رہنماؤں کی قربانیاں رنگ لائیں گی اب، ظلم کی سیاہ رات ختم ہونے والی ہے۔

 

Comments

comments

یہ بھی پڑھیں