اسلام آباد : معاون خصوصی فردوس عاشق اعوان نے کہا ہے کہ حکومت ملک میں فلمی صنعت کی بحالی کے حوالے سے عملی اقدامات کرے گی، ہم نے پاکستان کا روشن چہرہ پوری دنیا میں روشناس کرانا ہے۔
ان خیالات کا اظہار انہوں نے اسلام آباد میں فلم پروڈیوسرز ایسوسی ایشن کے وفد سے ملاقات کے موقع پر گفتگو کرتے ہوئے کیا.
وزیر اعظم کی معاون خصوصی برائے اطلاعات فردوس عاشق اعوان سے فلم پروڈیوسرز ایسوسی ایشن کے وفد نے ملاقات کی وفد کی سربراہی ایسوسی ایشن کے چیئرمین شیخ امجد رشید نے کی۔
شیخ امجد رشید نے ڈاکٹر فردوس عاشق اعوان کو فلمی صنعت کے مسائل سے تفصیلی آگاہ کرتے ہوئے کہا کہ فلمی صنعت کی ترقی کیلئے حکومتی سرپرستی اور حوصلہ افزائی ضروری ہے۔
فردوس عاشق اعوان کا کہنا تھا کہ ہم نے پرعزم، پرامن اور پرکشش پاکستان کی تصویر دنیا کے سامنے پیش کرنی ہے اور پاکستان کاروشن چہرہ پوری دنیا میں روشناس کرانا ہے۔
ڈاکٹرفردوس عاشق اعوان کا مزید کہنا تھا کہ فلمیں معاشرے کی اصلاح اور ہماری اقدار کو اجاگر کرنے کا اہم ذریعہ ہوتی ہیں، اسٹیک ہولڈرز فلم پالیسی کا جائزہ لیں، ہم مثبت تجاویز کا خیرمقدم کریں گے۔
انہوں نے بتایا کہ پاکستان ٹیلی وژن نئی بننے والی فلموں کے تعارف کیلئے پروگرام ترتیب دے گا اور حکومتی سطح پر فلمی صنعت کی بحالی کے حوالے سے عملی اقدامات کیے جائیں گے، اس ضمن میں وزارت اطلاعات فوکل پرسنز تعینات کرے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں