The news is by your side.

Advertisement

وزیر اعظم کے کامیاب دورے سے ہاؤس آف شریف کے ارمانوں پر اوس پڑ گئی: فردوس عاشق اعوان

اسلام آباد: وزیر اعظم کی معاون خصوصی فردوس عاشق اعوان کا کہنا ہے کہ وزیر اعظم عمران خان کے دورہ امریکا کی کامیابیوں سے ہاؤس آف شریف کے ارمانوں پر اوس پڑ گئی۔ وزیر اعظم نے تنازعہ کشمیر کے حل کی اہمیت کو بھرپور انداز میں اجاگر کیا۔

تفصیلات کے مطابق وزیر اعظم کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ وزیر اعظم عمران خان کے دورہ امریکا کی کامیابیوں سے ہاؤس آف شریف کے ارمانوں پر اوس پڑ گئی۔

معاون خصوصی کا کہنا تھا کہ شہباز شریف کا بیان کپتان کے خلاف حسد کا اظہار ہے۔ امریکا میں پاکستانیوں کا تاریخ کا سب سے بڑا جلسہ دیکھ کر برداشت نہیں ہوا۔

اپنے ٹویٹ میں انہوں نے مزید کہا کہ عمران خان کشمیریوں کے وکیل بن کر ابھرے، تنازعہ کشمیر کے حل کی اہمیت کو بھرپور انداز میں اجاگر کیا۔ شہباز شریف کشمیر پر سیاست کرنے سے پہلے آنکھیں کھول کر سید علی گیلانی کا بیان پڑھ لیتے۔ کشمیریوں کے قائد خوشی کا اظہار کر رہے ہیں۔

معاون خصوصی کا کہنا تھا کہ کم ظرف سوچ کے ساتھ بسوں میں سفر کا طعنہ دینے کے بجائے عمران خان کی سادگی اور کفایت شعاری کی مثال سے سیکھتے، شہباز صاحب! آپ سب سے بڑے شعبدہ باز ہیں جو لندن میں تو سڑکیں پیدل ناپتے ہیں لیکن پاکستان آتے ہی پروٹوکول کے نشے کا شکار ہو جاتے ہیں۔

انہوں نے کہا کہ عمران خان سے عداوت اور بغض میں جتنا عوام کو گمراہ کرتے ہیں، ان کی محبت عمران خان کے لیے بڑھتی جاتی ہے۔ ایرینا ون کے عوامی جوش و خروش، والہانہ استقبال اور صدر ٹرمپ کے ساتھ کامیاب ملاقات نے ان کی نیندیں اڑا دیں ہیں۔

معاون خصوصی کا مزید کہنا تھا کہ شہباز شریف کا وزیر اعظم کے دورہ امریکا کے حوالے سے بیان ان کی پست سوچ اور کرپٹ خصلت کا آئینہ دار ہے۔

Comments

یہ بھی پڑھیں