The news is by your side.

Advertisement

او آئی سی گولڈن جوبلی تقریبات میں شرکت کے بعد فردوس عاشق اعوان آج وطن لوٹیں گی

جدہ: وزیر اعظم کی معاون خصوصی برائے اطلاعات و نشریات فردوس عاشق اعوان اسلامی تعاون تنظیم (او آئی سی) کے قیام کی گولڈن جوبلی تقریبات میں پاکستان کی نمائندگی، اور عمرے کی ادائیگی کے بعد آج وطن واپس لوٹ رہی ہیں۔

تفصیلات کے مطابق وزیر اعظم عمران خان کی معاون خصوصی برائے اطلاعات و نشریات فردوس عاشق اعوان نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ خدائے بزرگ و برتر کا شکر ادا کرتی ہوں جس نے اپنے گھر اور روضہ آقا کریم کے در کی حاضری کی سعادت عطا فرمائی۔

اپنے ٹویٹ میں انہوں نے کہا کہ عمرہ ادائیگی کی سعادت کے بعد روضہ رسول کریم پر حاضری نصیب ہوئی جہاں ملکی ترقی اور استحکام کے لیے خصوصی دعا کی۔

انہوں نے کہا کہ او آئی سی کے قیام کی گولڈن جوبلی تقریبات میں شرکت کے سلسلے میں دورہ مکمل کر کے آج وطن واپسی ہوگی۔

خیال رہے کہ معاون خصوصی فردوس عاشق اعوان اسلامی تعاون تنظیم (او آئی سی) کے قیام کی گولڈن جوبلی تقریبات میں شرکت کے لیے 2 روزہ دورے پر سعودی عرب میں موجود تھیں۔

معاون خصوصی نے گولڈن جوبلی کی تقریبات میں پاکستان کی نمائندگی کی، انہوں نے تنظیم کے سیکریٹری جنرل اور سعودی وزیر خارجہ کی دعوت پر شرکت کی تھی۔

اس موقع پر انہوں نے کہا تھا کہ اسے دنیا بھر میں ظلم و جبر اور زیادتی کے شکار مسلمانوں کے مسائل کے حل کے لیے مزید فعال اور مؤثر کردار ادا کرنا ہے۔

معاون خصوصی کا کہنا تھا کہ امہ کو درپیش مسائل اور اسلامو فوبیا جیسے چیلنج سے نبرد آزما ہونے کے لیے یکساں مؤقف اور جامع حکمت عملی ترتیب دینے کی ضرورت ہے۔

انہوں نے مزید کہا تھا کہ مظلوم کشمیریوں کی حمایت اور ان کے ساتھ اظہار یکجہتی پر سیکریٹری جنرل او آئی سی کا شکریہ ادا کرتے ہیں، اس فورم سے کشمیریوں کے جمہوری بنیادی حق اور وادی میں سنگین صورتحال کو اجاگر کرنے کے لیے مزید آواز بلند کرنا ہوگی۔

fb-share-icon0
Tweet 20

Comments

comments

یہ بھی پڑھیں