The news is by your side.

Advertisement

کراچی، فردوس شمیم نقوی کے کوآرڈینیٹر کو اغوا کرنے کی کوشش ناکام

کراچی: شہر قائد کے علاقے گلشن اقبال میں فردوس شمیم نقوی کے کوآرڈینیٹر کو اغوا کرنے کی کوشش ناکام بنادی گئی، پولیس کی بروقت کارروائی کے دوران ملزمان فائرنگ کرتے ہوئے فرار ہوگئے۔

تفصیلات کے مطابق کراچی کے علاقے گلشن اقبال پٹیل اسپتال کے قریب تحریک انصاف کے رہنما فردوس شمیم نقوی کے کوآرڈینیٹر ریحان غوری کو 3 ملزمان نے اغوا کرنے کی کوشش کی، ملزمان ریحان غوری کو گھسیٹتے رہے، مبینہ ٹاؤن تھانے کے اے ایس آئی شاہنواز کی ہوائی فائرنگ پر ملزمان فرار ہوگئے۔

ملزمان کے خلاف مقدمے کے اندراج کے لیے درخواست جمع کرادی ہے

فردوس شمیم نقوی

مبینہ ٹاؤن تھانے کے باہر پی ٹی آئی رہنما اور سندھ اسمبلی میں اپوزیشن لیڈر فردوس شمیم نے میڈیا سے گفتگو کرتے ہوئے کہا کہ میرے کوآرڈینیٹر ریحان غوری حملے میں بال بال بچے ہیں۔

انہوں نے کہا کہ پٹیل اسپتال کے قریب ملزمان نے ریحان کے اغوا کی کوشش کی، 3 ملزمان دو موٹر سائیکلوں میں سوار تھے، پولیس نے بروقت کارروائی کرتے ہوئے فائرنگ کی۔

فردوس شمیم نقوی نے کہا کہ پولیس کی فائرنگ پر ملزمان ایک موٹر سائیکل چھوڑکر فرار ہوگئے، ملزمان کے خلاف مقدمے کے اندراج کے لیے درخواست جمع کرادی ہے۔

دوسری جانب پولیس حکام کا کہنا ہے کہ واقعہ اغوا کی کوشش ہے یا اسٹریٹ کرائم ابھی تفتیش جاری ہے۔

Comments

comments

یہ بھی پڑھیں