The news is by your side.

Advertisement

سولو فلائٹ کا دور ختم، سب کو مل کر ٹیم کی طرح کام کرنا ہوگا، فردوس عاشق اعوان

اسلام آباد: نومنتخب وفاقی مشیر اطلاعات فردوس عاشق اعوان نے کہا ہے کہ عہدہ ملنے پر بہت خوش ہوں، حالات کو مدنظر رکھتے ہوئے حکومت کو حکمتِ عملی تبدیل کرنا پڑی، سولو فلائٹ والا دور گیا اب سب کو مل کر ایک ٹیم کی طرح کام کرنا ہوگا۔

اے آر وائی کے پروگرام الیونتھ آور میں میزبان وسیم بادامی کے ہمراہ گفتگو کرتے ہوئے فردوس عاشق اعوان کا کہنا تھا کہ ’زرداری صاحب کےدور میں وزارت اطلاعات کو4 جگہ سے چلایاجارہاتھا اسی لیے مفادات کا ٹکراؤ تھا اور میرے استعفے کی اہم وجہ بھی یہی تھی’۔

فردوس عاشق اعوان کا کہنا تھا کہ وزیراعظم کی جانب سے مجھے مشیر اطلاعات کا عہدہ دیے جانے کی کال موصول ہوئی، عمران خان کو مجھ پر اعتماد ہے اس لیے نہ صرف وہ بات سنتے بلکہ عمل درآمد بھی کراتے ہیں۔

اُن کا کہنا تھا کہ وزیراعظم نےکال کرکے کہا کہ آپ کو وزارت اطلاعات دے رہا ہوں، فوادچوہدری نے مشکل حالات میں وزارت اطلاعات میں اچھی کارکردگی دکھائی۔

مزید پڑھیں: وفاقی کابینہ میں بڑی تبدیلیاں، کئی وزرا کے قلم دان تبدیل

مشیر اطلاعات کا کہنا تھا کہ ’موجودہ حالات میں ہمیں اپنی حکمتِ عملی تبدیل کرنا پڑی، کوئی اکیلے کام نہیں کرسکتا اس لیے سب کو ٹیم ورک کی طرح چلنا ہوگا‘۔

یاد رہے کہ اسد عمر کی جانب سے مستعفیٰ ہونے کے اعلان کے بعد وزیر اعظم نے کارکردگی نہ دکھانے والے وزراء کے قلم دان تبدیل کرنے کا فیصلہ کیا۔ وزیر اعظم آفس کی جانب سے جاری ہونے والے نوٹی فکیشن کے مطابق فوادچوہدری سے اطلاعات کی وزارت واپس لے کر فردوس عاشق اعوان کو مشیراطلاعات کا قلم دان سونپ دیا گیا جبکہ فواد چوہدری کو سائنس و ٹیکنالوجی کی وزارت دے دی گئی۔

اسی طرح غلام سرور پیٹرولیم ڈویژن کی وزارت سے ہٹا کر انہیں  ایوی ایشن (ہوا بازی) کی وزارت دے دی گئی، جب کہ میاں محمد سومرو سے ایوی ایشن کا اضافی چارج واپس لے لیا گیا۔

یہ بھی پڑھیں: کیا اسد عمر کے بعد وزیر پیٹرولیم بھی استعفے کا اعلان کر دیں گے؟

اعجاز احمد شاہ کو وفاقی وزیر داخلہ بنا دیا گیا، شہریارآفریدی سیفران کے وزیرمملکت ہوں گے، اعظم سواتی کو پارلیمانی امور کا قلمدان دےدیا گیا، جب کہ اسد عمر کی جگہ فی الحال عبدالحفیظ شیخ مشیر خزانہ مقرر کیے گئے ہیں۔ فردوس عاشق اعوان وزارت اطلاعات ونشریات کی معاون خصوصی مقرر کی گئی ہیں، ظفر اللہ مرزا وزیراعظم کے معاون خصوصی برائے صحت مقرر کیا گیا ہے.

Comments

comments

یہ بھی پڑھیں