اسلام آباد: وزیر اعظم سیکرٹریٹ کی چھٹی منزل پر لگنے والی آگ پر قابو پالیا گیا، عملے کو بحفاظت نکال لیا گیا اور کوئی نقصان پیش نہیں آیا۔
تفصیلات کے مطابق وزیر اعظم سیکرٹریٹ کی چھٹی منزل پر اچانک آگ بھڑک اٹھی، اطلاع دیے جانے پر فائر بریگیڈ کی 5 گاڑیاں آگ بجھانے کے لیے موقع پر پہنچ گئیں۔ اس موقع پر اسکائی لفٹ بھی منگوا لی گئی جبکہ واپڈا اور سوئی گیس عملے کو بھی طلب کرلیا گیا۔
ترجمان پاک بحریہ کے مطابق بحریہ کے 2 فائرٹینڈرز نے بھی آگ بجھانے کے عمل میں حصہ لیا۔ ذرائع کا کہنا ہے کہ آگ لگتے ہی آفس کو فوری طور پر خالی کروا لیا گیا۔
وزیر اعظم کے معاون خصوصی یوسف بیگ مرزا نے میڈیا سے گفتگو کرتے ہوئے بتایا کہ وزیر اعظم سیکرٹریٹ کے تیسرے فلور کے باتھ روم میں آگ لگی تھی، آگ کا دھواں عمارت کی چھٹی منزل تک پہنچ گیا تاہم فوری اقدام سے آگ پر قابو پا لیا گیا۔
انہوں نے بتایا کہ عملے کو بحفاظت نکال لیا گیا ہے اور کوئی نقصان نہیں ہوا۔
ابتدائی رپورٹ تیار
وزیر اعظم آفس میں لگنے والی آگ سے متعلق ابتدائی رپورٹ تیار کرلی گئی، رپورٹ کے مطابق آگ ممکنہ طور پر شارٹ سرکٹ کے باعث لگی، ٹیمیں عمارت کی ڈکٹ کھول کر آگ لگنے کی وجہ معلوم کر رہی ہیں۔
رپورٹ میں کہا گیا کہ آگ لگنے کے واقعے میں کوئی زخمی بھی نہیں ہوا، آگ کے باعث فرنیچر کو بھی نقصان نہیں پہنچا اور دستاویزات اور رپورٹس بھی محفوظ رہیں۔
