کراچی : سائٹ غنی چورنگی کےقریب پلاسٹک بنانے والی فیکڑی میں لگنے والی آگ پر قابو پا لیا گیا تاہم آگ کے باعث کمرے کا کچھ حصہ گرگیا۔
تفصیلات کے مطابق کراچی کے علاقے سائٹ غنی چورنگی کےقریب پلاسٹک بنانے والی فیکٹری میں آگ لگ گئی اور دیکھتے ہی دیکھتے آگ شدت اختیار کرگئی۔
اطلاع ملتے ہی فائربریگیڈ کی گاڑیاں اور ایک اسنار کل پہنچی اور فیکٹری میں لگنے والی آگ پر قابو پانے کی کوششیں کرنے لگی۔
فائر بریگیڈ حکام نے بتایا کہ فیکٹری سے تمام افراد کو نکال لیا گیا ہے، آگ عمارت کی بالائی منزل پر لگی، عمارت کی چھت پر عارضی کمرے بنائے گئے تھے تاہم آتشزدگی سے فیکٹری کی بالائی منزل کی دیوار گر گئی۔
حکام نے عمارت میں لگی آگ کو دوسرے درجے کی قرار دیتے ہوئے کہا کہ پانی کی مسلسل فراہمی کے لیے واٹر باوزر بھی موجود ہیں۔
فائر بریگیڈ حکام کا کہنا تھا کہ کئی گھنٹوں کی جدوجہد کے بعد آگ پر قابو پالیا گیا ، آگ بجھانے کے عمل میں فائر بریگیڈ کی8 گاڑیوں اور ایک اسنارکل نے حصہ لیا۔
