The news is by your side.

Advertisement

لاہور: وکیل خدیجہ صدیقی کے گھر پر فائرنگ، گاڑی کے شیشے ٹوٹ گئے

لاہور میں وکیل خدیجہ صدیقی کے گھر پر نامعلوم شخص فائرنگ کرکے فرار ہوگیا، فائرنگ سے گاڑی کے شیشے ٹوٹ گئے۔

اے آر وائی نیوز کے مطابق لاہور کے علاقے گلبرگ میں نامعلوم شخص نے وکیل خدیجہ صدیقی کے گھر پر فائرنگ کی جس سے ان کی گاڑی کے شیشے ٹوٹ گئے، واضح رہے کہ خدیجہ صدیقی کو چھریوں کے وار سے زخمی کرنے والا ملزم چند روز پہلے رہا ہوا ہے۔

خدیجہ صدیقی نے تھانہ گلبرگ میں درخواست جمع کروادی، درخواست میں انہوں نے موقف اختیار کیا کہ میں گھر پر موجود تھی کہ فائرنگ کی آواز آئی باہر جاکر دیکھا تو گاڑی کے بونٹ پر ایک گولی لگی تھی، گاڑی پر کسی نامعلوم شخص نے فائرنگ کی ہے۔

درخواست میں خواجہ صدیقی کا کہنا تھا کہ 3 مئی 2016 میں بھی مجھ پر قاتلانہ حملہ ہوا تھا، میری جان کو خطرہ ہے قانونی کارروائی کی جائے، فیاض چوہان نے کہا تھا کہ جب بھی کوئی تھریٹ ہوگا مقدمہ درج کرواؤں گا۔

خدیجہ صدیقی کے والد احمد صدیقی کا کہنا ہے کہ گھر سے باہر تھا واپس آیا تو بیٹی پریشان تھی، بیٹی نے کہا کہ گھر پر کوئی فائرنگ کرکے گیا ہے۔

دوسری جانب ترجمان پنجاب حکومت فیاض الحسن چوہان کا کہنا تھا کہ میری خدجہ صدیقی سے تفصیلی بات ہوئی ہے، انہیں ملزمان کیخلاف کارروائی کی یقین دہانی کرائی ہے، واقعے کی مکمل انکوائری کی جائے گی، ذمہ داروں کے خلاف کارروائی ہوگی۔

یاد رہے کہ مئی 2016 میں قانون کی طالبہ خدیجہ صدیقی پر شاہ حسین نے چھری کے 23 وار کیے تھے، جس سے وہ شدید زخمی ہوگئی تھیں البتہ خوش قسمتی سے وہ محفوظ رہیں اور انصاف کے لیے انہوں نے جنگ بھی لڑی۔

Comments

یہ بھی پڑھیں