site
stats
سندھ

نجی چینل کی ڈی ایس این جی پر فائرنگ، ایک شخص جاں بحق 1 زخمی

کراچی: نارتھ ناظم آباد کے علاقے کے ڈی اے چورنگی کے قریب نجی ٹیلی ویژن کی گاڑی پر نامعلوم  افراد کی فائرنگ کے نتیجے میں اسسٹنٹ کیمرہ مین تیمور جاں بحق جبکہ ڈرائیور زخمی ہوا۔

تفصیلات کے مطابق نارتھ ناظم آباد کے علاقے کے ڈی اے چورنگی کے قریب نامعلوم افراد نے سماء ٹی وی چینل کی ڈی ایس این جی پر فائرنگ کی جس کے نتیجے میں 2 افراد زخمی ہوئے۔ فائرنگ کا نشانہ بننے والے افراد کو طبی امداد کے لیے عباسی شہید اسپتال منتقل کیا گیا تاہم اسسٹنٹ کیمرہ مین تیمور زخموں کی تاب نہ لاتے ہوئے دم توڑ گیا جبکہ ڈی ایس این جی آپریٹر کی حالت تشویشناک ہے۔

پولیس کے مطابق نامعلوم افراد میڈیا کی گاڑی کو نشانہ بنا کر فرار ہوئے۔ ابتدائی معلومات میں یہ بات سامنے آئی کہ گاڑی میں 2 افراد شامل تھے جنہیں طبی امداد کے لیے عباسی شہید اسپتال منتقل کیا گیا۔

پولیس نے جائے وقوعہ سے شواہد اکھٹے کر کے تفتیش کا آغاز کردیا ہے جبکہ اسپتال منتقل کیے جانے والے دو افراد میں سے اسسٹنٹ کیمرہ مین زخموں کی تاب نہ لاتے ہوئے دم توڑ گیا۔

قبل ازیں نارتھ ناظم آباد کے علاقے فائیو اسٹار چورنگی کے قریب کھڑی پولیس موبائل پر نامعلوم افراد کریکر پھینک کر فراد ہوئے جو خوش قسمتی سے پھٹ نہ سکا، آئی جی سندھ نے پولیس موبائل پر حملے کا نوٹس لیتے ہوئے فوری رپورٹ طلب کی ہے۔

دریں اثناء وزیر اعلیٰ سندھ سید مراد علی شاہ نے سما ٹی وی کی گاڑی پر فائرنگ کا نوٹس لیتے ہوئے آئی جی سندھ کو فون کر کے واقعے کی رپورٹ طلب کر لی ہے۔

وزیراعلیٰ سندھ نے کہا کہ سما نیوز چینل کی ڈی سی این جی پر فائرنگ اور پولیس وین پر کریکر حملہ کے واقعات چند ہی گھنٹوں میں ایک ہی ضلع وسطی میں پیش آئے ہیں جس کے سدباب کے لیے فوری ایکشن لیا جائے اور پولیس کو موبلائز کیا جائے۔

وزیراعلیٰ سندھ سید مراد علی شاہ نے سما چینل کے اسسٹنٹ کیمرہ مین کے جاں بحق ہونے پر افسوس کا اظہار کرتے ہوئے کہا کہ مجرم جہاں بھی چھپے بیٹھے ہوں انہیں گرفتار کیا جائے گا اور قانون کے مطابق سخت سے سخت سزا دی جائے گی۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top