The news is by your side.

Advertisement

بائیڈن اور ولادی میر کی پہلی ملاقات

واشنگٹن: امریکی اور روسی صدور کی پہلی ملاقات طے ہو گئی، وائٹ ہاؤس کا کہنا ہے کہ 16 جون کو سوئٹزرلینڈ میں دونوں رہنماؤں کی ملاقات ہوگی۔

تفصیلات کے مطابق امریکی صدر جو بائیڈن اور روسی صدر ولادی میر پیوٹن سربراہی اجلاس کے انتظامات کو حتمی شکل دے دی گئی، منگل کو وائٹ ہاؤس نے تصدیق کی کہ اس سلسلے میں وائٹ ہاؤس اور کریملن نے مل کر انتظامات طے کر لیے ہیں۔

وائٹ ہاؤس کا کہنا ہے کہ دونوں صدور کی پہلی ملاقات 16 جون کو جنیوا میں ہوگی، دونوں رہنما اہم امور پر تبادلہ خیال کریں گے، نیز دونوں ممالک تعلقات میں بہتری کے خواہاں ہیں۔

وائٹ ہاؤس سے جاری بیان میں کہا گیا ہے کہ دونوں رہنما تمام سلگتے مسائل پر بات چیت کریں گے، کیوں کہ ہم چاہتے ہیں کہ امریکا اور روس کے تعلق میں استحکام اور شفافیت بحال ہو۔

کریملن نے اپنے بیان میں کہا کہ ہمارا ارادہ ہے کہ تزویراتی استحکام کی مشکلات، اس کے ساتھ ساتھ بین الاقوامی ایجنڈے پر موضوعاتی امور، بشمول کرونا وبا کے خلاف جنگ میں باہمی تعامل، اور علاقائی تنازعات کے حل کے سلسلے میں روسی امریکی تعلقات میں مزید بہتری کے امکانات پر گفتگو کی جائے۔

یہ متوقع طویل ملاقات بائیڈن کے اقتدار سنبھالنے کے بعد پہلے بین الاقوامی سفر کے اختتام پر ہوگی، حکام نے بتایا کہ وائٹ ہاؤس نے قومی سلامتی کے مشیر جیک سلیوان کو رواں ہفتے اپنے روسی ہم منصب سے ملاقات کے لیے جنیوا بھیجا تھا، تاکہ ملاقات کے سلسلے میں تفصیلات کو حتمی شکل دی جا سکے۔

جنیوا میں یہ ملاقات کس مقام پر ہوگی، اس سلسلے میں وائٹ ہاؤس کے ترجمان نے تبصرہ کرنے سے انکار کیا، ان کا کہنا تھا کہ جب تک تمام تر تفصیلات طے نہیں ہو جاتیں، وہ اس پر کچھ نہیں بتا سکتے۔

Comments

یہ بھی پڑھیں