کراچی : محکمہ موسمیات نے کہا ہے کہ رواں سال کا پہلا چاند گرہن10 اور 11 جنوری کی درمیانی شب کو ہوگا ، اس قدرتی مناظر کو پاکستان سمیت دنیا کے بیشتر ممالک میں دیکھا جاسکے گا۔
تفصیلات کے مطابق محکمہ موسمیات نے سال 2020 کے چاند گرہن کی پیشگوئی کرتے ہوئے کہا رواں سال کا پہلا چاند گرہن دس اور گیارہ جنوری کی درمیانی شب کو ہوگا، جو تقریبا چار گھنٹے تک رہے گا۔
محکمہ موسمیات کے مطابق چاند گرہن 10بجکر 08 منٹ پر شروع ہوگا ، مکمل گرہن 12 بجکر 10 منٹ پر لگے گا جبکہ رات 2 بج کر 12 منٹ پر گرہن ختم ہوگا جبکہ دس اور گیارہ کی شب کو مطلع ابر الود رہنے کا امکان ہے، اس قدرتی مناظر کو پاکستان سمیت دنیا کے بیشتر ممالک میں دیکھا جاسکے گا۔
محکمہ موسمیات کے مطابق سال 2020 کا پہلا چاند گرہن 10 اور 11 جنوری جبکہ دوسرا چاند گرہن 5 اور 6 جون 2020 کی درمیانی شب میں ہوگا،21 جون کو پاکستان میں پہلا سورج گرہن ہوگا۔
مزید پڑھیں : پاکستان میں سورج کو گرہن لگ گیا
خیال رہے سال 2020 میں 2چاند اور 2سورج گرہن ہوں گے، پہلا چاند گرہن 10اور 11جنوری کی درمیا نی شب اور دوسرا چاند گرہن 5اور 6جون کی درمیانی شب کو ہوگا جبکہ پہلا سورج گرہن 21جون کو ہوگا، جو پاکستان میں بھی نظر آئے گا۔
یاد رہے گزشتہ سال دو چاند گرہن ہوئے تھے، جس میں 21 جنوری کا چاند گرہن پاکستان میں نہیں دیکھا گیا تھا، ماہرین فلکیات نے اسے سپر بلڈ وولف مون کا نام دیا تھا جبکہ دوسرا چاند گرہن 16 اور 17 جولائی کو ہوا ،جس کا نظارہ پاکستان میں بھی دیکھا گیا تھا۔
واضح رہے کہ زمین کا وہ سایہ جو گردش کے دوران کرۂ زمین کے چاند اور سورج کے درمیان آ جانے سے چاند کی سطح پر پڑتا ہے اور چاند تاریک نظر آنے لگتا ہے، اُسے چاند گرہن کہتے ہیں۔
