نیویارک : امریکا کے جنوب مشرقی علاقوں میں موسم کی پہلی برفباری سےموسم سرد ہوگیا ، برفباری سے ہونے والے حادثات میں 7 افراد ہلاک ہوگئے جبکہ نیویارک میں بس سروس معطل ہوگئی۔
تفصیلات کے مطابق امریکا کی مختلف ریاستوں میں موسم کی پہلی برفباری سے جہاں لوگوں کے چہرے کھل اٹھے وہیں موسم سرد ہوگیا، نیویارک کے سینٹرل پارک اورٹائم اسکوائر میں بھی ہرچیز نے برف کی چادر اوڑھ لی۔
امریکی میڈیا کے مطابق امریکی ریاست واشنگٹن، رچمنڈ، ورجینیا، فلاڈیلفیا، پنسلوانیا، نیو یارک اور بوسٹن بارش اور برف باری ہوئی، بعض علاقوں میں تیس سینٹی میٹر تک برف پڑی، برفباری کے باعث پہاڑوں اور جنگلات نے سفید چادر اوڑھ لی۔
ٹریفک حادثات میں کم از کم پانچ افراد ہلاک اور متعدد زخمی ہوئے ہیں جبکہ نیویارک میں بس سروس معطل ہوگئی، دفاتر اور اسکولوں میں حاضری بھی معمول سے کم رہی۔
برفباری اوربارش کے باعث ٹریفک کی روانی متاثرہوئی جبکہ سڑکوں اورفٹ پاتھ سے برف ہٹانے کا کام بھی جاری رہا۔
ورجینیا،میری لینڈ سمیت شمال مشرقی ریاستوں میں لوگوں نے مختلف اندازمیں موسم کی پہلی برفباری سے لطف اٹھایا۔
امریکی محکمہ موسمیات نے آج بھی تیز یخ بستہ ہوائیں چلنے کے علاوہ شمالی علاقوں میں برفباری کے بعدموسم مزید سرد ہونے کی پیش گوئی کی ہے۔
