The news is by your side.

Advertisement

دورہ انگلینڈ کے لیے قومی کرکٹرز کی پہلی کو وِڈ 19 ٹیسٹنگ کل ہوگی

لاہور: دورہ انگلینڈ کے لیے قومی کرکٹ ٹیم کے کھلاڑیوں کی پہلی کو وِڈ 19 ٹیسٹنگ کل ہوگی۔

اے آر وائی نیوز کے مطابق کرکٹ ٹیم کے کھلاڑیوں کی دورہ انگلینڈ کے لیے پہلی کرونا ٹیسٹنگ کل ان کے اپنے اپنے شہر میں کی جائے گی۔

اس سلسلے میں پاکستان کرکٹ بورڈ نے لاہور، راولپنڈی، کراچی اور پشاور میں خصوصی انتظامات کر دیے ہیں، کھلاڑیوں کو گھروں میں رہنے کی ہدایت جاری کی گئی ہے۔

پہلی ٹیسٹنگ کے بعد کھلاڑی اور ٹیم آفیشلز 24 جون کو لاہور پہنچیں گے، مقامی ہوٹل میں تمام کھلاڑیوں کی دوسری ٹیسٹنگ 25 جون کو متوقع ہے، 28 جون کو انگلینڈ کے لیے خصوصی طیارہ قومی ٹیم کے کھلاڑیوں کو لے کر اڑان بھرے گا۔

دورہ انگلینڈ کیلئے کھلاڑیوں کی حفاظت پر کوئی سمجھوتا نہیں ہوگا، وسیم خان

یاد رہے کہ دو دن قبل چیف ایگزیکٹو پی سی بی وسیم خان نے کہا تھا کہ دورہ انگلینڈ کے لیے کھلاڑیوں کی حفاظت پر کوئی سمجھوتا نہیں ہوگا، اس سلسلے میں پی سی بی اور انگلینڈ کرکٹ بورڈ ایس او پیز تیار کر رہے ہیں۔

پاکستان اور انگلینڈ کے درمیان پہلا ٹیسٹ میچ 5 اگست کو مانچسٹر میں کھیلا جائے گا۔ قومی ٹیم دوسرا اور تیسرا ٹیسٹ اور ٹی ٹوینٹی سیریز ساؤتھمپٹن میں کھیلے گی۔ دونوں ٹیموں کے درمیان ٹی ٹوینٹی سیریز 28 اگست سے یکم ستمبر تک کھیلی جائے گی۔

Comments

یہ بھی پڑھیں