کوئٹہ : صوبہ بلوچستان کے علاقے مچھ کے قریب وین اور ٹرک کے درمیان ہونے والے تصادم کے نتیجے میں 5 افراد جاں بحق جبکہ دو زخمی ہوگئے۔
تفصیلات کے مطابق بلوچستان کے علاقے مچھ کے قریب وین اور ٹرک ٹکرا گئے جس کے نتیجے میں 3 گاڑیوں اور پولیس چوکی کو آگ لگ گئی۔
آگ لگنے کے باعث 5 افراد جھلس کر جاں بحق جبکہ دو افراد زخمی ہوگئے، لاشوں اور زخمیوں کو اسپتال منتقل کردیا گیا۔
سرگودھا: بس اور اسکول وین میں تصادم‘ 7 افراد جاں بحق
یاد رہے کہ گزشتہ ہفتے صوبہ پنجاب کے شہرسرگودھا میں تیزرفتار بس اور اسکول وین میں تصادم کے نتیجے میں 5 طالبات اور ڈرائیور سمیت 7 افراد جاں بحق ہوگئے تھے۔
حادثے کے فوری بعد مشتعل افراد نے بس کو آگ لگا دی تھی تاہم بس ڈرائیور موقع سے فرار ہونے میں کامیاب ہوگیا تھا۔
واضح رہے کہ گزشتہ ماہ 16 ستمبر کو ملتان میں چوک سرور شہید کے قریب ایم ایم روڈ پر منی وین اور ٹرک کے درمیان ہونے والے تصادم کے نتیجے میں 2 خواتین سمیت ایک ہی خاندان کے 4 افراد جاں بحق ہوگئے تھے۔
