اسپین کے دارالحکومت میڈرڈ میں وزیر اعظم ہاؤس سمیت پانچ اہم مقامات سے دھماکا خیز مواد برآمد کرلیا گیا۔
خبر ایجنسی رائٹرز کے مطابق بم ڈسپوزل ماہرین نے آج پانچ مقامات سے دھماکا خیز مواد برآمد کر کے انہیں ناکارہ بنا دیا جبکہ دارالحکومت سمیت ملک بھر میں سکیورٹی سخت کر دی گئی۔
اسپین کے نائب وزیر داخلہ نے میڈیا کو بتایا کہ اطلاعات ہیں کہ پانچوں لیٹر بم ملک کے اندر سے ہی بھیجے گئے۔
سیکورٹی کے ذمہ دار جونیئر وزیر رافیل پیریز نے بتایا کہ دیسی ساختہ بم پیکجز کی شکل میں مقامات پر بھیجے گئے جن میں آتش گیر پاؤڈر اور ٹرپ وائر تھے، یہ دھماکے کے بجائے شعلے پیدا کرتے ہیں۔
لیٹر بموں کے اوپر اداروں کے سربراہوں کے نام بھی تحریر تھے۔ پانچ لیٹر بموں میں سے ایک دارالحکومت میں قائم یوکرینی سفارت خانے میں پھٹ گیا جس سے ایک سکیورٹی اہلکار زخمی ہوا۔
تین بموں کو ناکارہ بنایا گیا جبکہ ایک کو تحقیقات کے لیے رکھا گیا ہے۔
