پشاور : قانون نافذ کرنے والے اداروں نے مہمند ایجنسی اور پشاور میں دھماکے کے بعد غلنئی کے علاقے میں سرچ آپریشن کے دوران 5 دہشت گردوں کو ہلاک کردیا گیا۔
تفصیلات کے مطابق مہمند ایجنسی میں آج صبح ہونے والے دھماکے کے بعد سیکیورٹی فورسز نے مختلف علاقوں کا محاصرہ کر کے سرچ آپریشن کیا جس کے دوران غلنئی کے علاقے میں دہشت گردوں سے مڈبھیڑ میں پانچ دہشت گرد ہلاک ہوگئے۔
ترجمان فرنٹیئر کانسٹبلری نے واقعہ کی تصدیق کرتے ہوئے بتایا ہے کہ سرچ آپریشن کے دوران شیخ بانڈہ میں غلنئی کے علاقے کے قریب دہشت گردوں سے مقابلے میں پانچ دہشت گردوں کو ہلاک کردیا گیا ہے۔
ذرائع کے مطابق قانون نافذ کرنے والے اداروں نے سرچ آپریشن کے دوران دہشت گردوں کے کمین گاہوں کے قریب پہنچ گئے تھے جسے بھانپتے ہوئے دہشت گردوں نے سیکیورٹی فورس پر فائرنگ کردی تاہم سیکیورٹی فورسز کی جوابی کارروائی میں پانچوں دہشت گرد ہلاک ہو گئے۔
و اضح رہے کہ آج مہمند ایجنسی کے علاقے غلنئی میں پالیٹکل انتظامیہ کے ہیڈ کوارٹر کے گیٹ پر خود کش دھماکے میں 3 خاصہ دار اہلکار سمیت 6 افراد شہید ہو گئے تھے جب کہ سیکیورٹی فورسز کی جوابی کارروائی میں دہشت گرد کا ساتھی بھی ہلاک ہوا تھا۔
بعد ازاں پشاور کے علاقے حیات آباد میں بھی دہشت گردوں نے جج کی گاڑی کو نشانہ بناکر دھماکے سے اُڑادیا کیا جس کے نتیجے میں دو افراد شہید جب کہ 18افراد زخمی ہوگئے جن میں 3 خواتین بھی شامل ہیں۔
