قندھار : متحدہ عرب امارات نے قندھار بم دھماکے میں اپنے پانچ افراد کے جاں بحق ہونے کی تصدیق کردی۔
تفصیلات کے مطابق افغانستان کے صوبے قندھار میں صوبائی گورنر کے دفتر کے احاطے میں ہونے والے دھماکے میں جاں بحق ہونے والے افراد میں متحدہ عرب امارات کے 5 سفارت کار بھی شامل تھے ، یو اے ای کے حکام نے ہلاکتوں کی تصدیق کردی۔
*کابل اور قندھار میں دھماکے، 37 افراد جاں بحق، 98 زخمی
جب کہ اسی دھماکے میں متحدہ عرب امارات کے سفیر اور قندھار کے گورنر زخمی ہوگئے تھے جو مقامی اسپتال میں زیر علاج ہیں اور تیزی سے صحت یابی حاصل کر رہے ہیں۔
واضح رہے قندھار دھماکے میں جاں بحق ہونے والے عام افراد کے علاوہ قندھار کے نائب گورنر، افغانستان کی وزارتِ خارجہ کے دو اعلیٰ اہلکار اور دو اراکینِ پارلیمنٹ بھی شامل ہیں۔
یاد رہے گزشتہ روز کابل میں افغان پارلیمان کے نزدیک اور قندھار میں صوبائی گورنر کے دفتر کے احاطے میں چار خودکش دھماکوں کے نتیجے میں 50 افراد جاں بحق اور 95 سے زائد زخمی ہوگئے تھے۔
