دبئی: متحدہ عرب امارات میں تمام قومیتوں کے لیے 5 سالہ سیاحتی ویزے کا اعلان کردیا گیا۔
غیرملکی خبررساں ادارے کی رپورٹ کے مطابق متحدہ عرب امارات کے نائب صدر اور وزیراعظم شیخ محمد بن راشد المکتوم کی زیر صدارت اجلاس میں تمام قومیتوں کے لیے 5 سالہ سیاحتی ویزے کا اعلان کیا گیا۔
شیخ محمد بن راشد المکتوم کا کہنا تھا کہ آج ہم ملک میں سیاحتی ویزا جاری کرنے کے نظام میں تبدیلی کررہے ہیں تاکہ سیاحتی ویزا کی مدت کو پانچ سال کے لیے قابل استعمال تمام قومیتوں کے لیے بنایا جائے۔
#UAE Cabinet chaired by @HHShkMohd, approves new amendment for tourist visas in #UAE. The new tourist visa will be valid for 5 years and can be used for multiple entries and is open for all nationalities. pic.twitter.com/T2gZolAkjy
— Dubai Media Office (@DXBMediaOffice) January 6, 2020
انہوں نے مزید کہا کہ یو اے ای میں سالانہ 21 ملین سے زائد سیاحوں کی آمد ہوتی ہے اور ہم متحدہ عرب امارات کو بین الاقوامی سیاحتی مقام کے طور پر قائم کرنا چاہتے ہیں۔
واضح رہے کہ 4 دسمبر کو متحدہ عرب امارات کی وفاقی اتھارٹی برائے شناخت و شہریت نے واضح کیا تھا کہ بیرون ملک سے آنے والے مسافروں کے لیے 2 قسم کے ٹرانزٹ ویزا کی سہولت دستیاب ہے۔
ایک ٹرانزٹ ویزا بالکل مفت ہے جس کی میعاد 48 گھنٹے ہے جب کہ دوسرا ٹرانزٹ ویزا 96 گھنٹوں پر محیط ہے جس کے لیے 50 درہم ادائیگی کرنا ہوگی۔
یہ دونوں ٹرانزٹ ویزا صرف یواے ای کی ایئرلائنز سے سفر کرنے والے مسافروں کے لیے ہوں گے اور یو اے ای میں داخلے سے قبل اس کی منظوری لینا ہوگی۔