لاہور(16 اپریل 2026): پاکستانی اداکارہ و میزبان فضا علی نے اپنی متنازع ویڈیو وائرل ہونے کے بعد عوام سے معافی مانگ لی۔
فضا علی ایک معروف اداکارہ، میزبان اور گلوکارہ ہیں جو سارا سال ہی تنازعات کی زد میں رہتی ہیں۔ ایک بار پھر وہ سوشل میڈیا پر توجہ کا مرکز بنی ہوئی ہیں کیونکہ ان کے نئے شوہر اعجاز خان کے ساتھ شو کی ویڈیو وائرل ہوگئی ہے۔
فضا علی نے 41 سال کی عمر میں محبت ملنے کے بعد دوبارہ شادی کی ہے اور وہ اس شادی سے بے حد خوش ہیں۔ انہوں نے اپنے شو کے ذریعے ہی دنیا کو اپنے شوہر سے متعارف کروایا۔
شو کے دوران فضا علی نے اپنے شوہر سے کہا کہ وہ انہیں براہِ راست شو میں اٹھا لیں۔ ان کے شوہر نے ایسا ہی کیا، لیکن عوام کو یہ انداز ناگوار گزرا اور اسے نجی نوعیت کا قرار دیا گیا۔
سوشل میڈیا صارفین سے لے کر سیاستدانوں تک، بشمول حنا پرویز بٹ اور عظمیٰ بخاری، متعدد افراد نے فضا پر کھلے عام تنقید کی اور ان کے شو پر پابندی لگانے کا مطالبہ کیا۔
View this post on Instagram
اس سے قبل فضا علی نے بیانات اور نبیہا علی خان کے ساتھ ایک آڈیو انٹرویو کے ذریعے صورتحال پر وضاحت دی تھی، تاہم اب انہوں نے ایک ویڈیو کے ذریعے باقاعدہ معافی مانگ لی ہے۔
فضا کا کہنا تھا کہ یہ عمل اچانک ہوا اور ایک خوشگوار خاندانی لمحہ تھا، ان کی نیت غلط نہیں تھی۔ لیکن اس کے باوجود وہ ان تمام لوگوں سے معافی مانگتی ہیں جن کی دل آزاری ہوئی۔ وہ اپنے ناظرین کا احترام کرتی ہیں اور کسی کے جذبات کو ٹھیس نہیں پہنچانا چاہتی تھیں۔
عوام کی جانب سے اس معافی کی ویڈیو پر ملے جلے ردعمل کا اظہار کیا جا رہا ہے۔ ایک صارف نے لکھا آپ کی باڈی لینگویج آپ کے بیان سے مطابقت نہیں رکھتی، آپ کو احساس بہت دیر سے ہوا۔
ایک اور صارف نے کہا یہ کوئی خاندانی نہیں بلکہ ایک نجی لمحہ تھا تاہم کچھ صارفین نے ان کی حمایت بھی کی، ایک صارف کا کہنا تھا اپنی غلطی کا احساس ہونا اچھی بات ہے اور معافی مانگنا آپ کی بہادری ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں