واشنگٹن: امریکا کی جنوبی ریاست ٹینیسی میں سیلاب سے 22 افراد ہلاک ہو گئے۔
تفصیلات کے مطابق ٹینیسی کی ہیمپفریز کاؤنٹی میں ہفتے کے روز شدید سیلاب کے باعث کم از کم 22 افراد ہلاک جب کہ 30 سے زائد لاپتا ہوگئے ہیں۔
اس تباہ کن سیلاب میں دو جڑواں بچے بھی بہہ کر ہلاک ہو گئے ہیں، بچے اپنے والد کی گود میں تھے، لیکن وہ انھیں نہیں سنبھال سکے اور پانی میں گر کر بہہ گئے۔
ہیمپفریز کاؤنٹی کے شیرف کرس ڈیوس نے میڈیا کو بتایا کہ اس علاقے میں اپنے 28 سال کے دوران انھوں نے یہ بدترین سیلاب دیکھا ہے، بجلی کی بندش اور موبائل فون کی سہولت میں کمی نے بھی مسائل میں اضافہ کیا۔
امریکی میڈیا کے مطابق ہفتے کے روز وسطی ٹینیسی کے کچھ حصوں میں 12 انچز (30.48 سینٹی میٹر) بارش کے بعد پوری کاؤنٹی کی دیہی سڑکیں اور شاہراہیں بہہ گئیں اور تباہ کن سیلاب آیا۔
Devastating floods destroyed homes and vehicles, and took at least 21 lives in Tennessee, yesterday. https://t.co/KROZQZ8tSA pic.twitter.com/WkQhJkx85D
— AccuWeather (@accuweather) August 23, 2021
امریکی قومی محکمہ موسمیات کا کہنا ہے کہ بارش نے دریائے پینی میں پانی کی سطح کا ریکارڈ توڑ دیا ہے، جب کہ قومی محکمہ موسمیات ناشویلے نے ٹویٹ کیا کہ اس وقت علاقے میں صورت حال جان لیوا ہے۔
ماہر موسمیات کریسے ہورلے نے میڈیا کو بتایا کہ لوگ گھروں میں پھنسے ہوئے ہیں، اور وہاں سے نکلنے کا کوئی راستہ نہیں ہے، پانی ان کی گردنوں سے اوپر تک ہے، یہ تباہ کن ہے اور بدترین صورت حال ہے۔
