ٹوکیو: جاپان میں اڑنے والی دنیا کی سب سے چھوٹی کار کی کامیاب آزمائشی پرواز کر لی گئی۔
تفصیلات کے مطابق جاپانی کمپنی اسکائی ڈرائیو نے اڑنے والی دنیا کی سب سے چھوٹی کار کا کامیاب تجربہ کیا ہے جس میں ایک شخص بھی سوار تھا۔
اسکائی ڈرائیو اڑنے والی کار بنانے کے منصوبے پر کام کرنے والی پہلی کمپنی نہیں ہے، اس منصوبے پر دنیا بھر کی کئی کمپنیاں کام کر رہی ہیں تاہم پہلے قابل عمل کامیاب تجربے کا اعزاز جاپانی کمپنی کو حاصل ہوا ہے۔
جاپانی کمپنی کے مطابق یہ کار اب تک 10 منٹ تک پرواز کرچکی ہے اور ان کا ارادہ ہے کہ اسے کم از کم 30 منٹ تک لے جایا جائے۔دو میٹر اونچائی اور چار میٹر کی لمبائی اور چوڑائی کے ساتھ یہ کار دو کاروں کی جگہ پارک کی جاسکتی ہے۔
اس کار کے ذریعے لوگ ٹریفک میں پھنسے بغیر اپنی منزل پر پہنچ سکیں گے، اس کی خاص بات یہ ہے اسے اڑانے کے لیے کسی پائلٹ کی بھی ضرورت نہیں ہوگی اور سارا نظام کمپیوٹر کے ذریعے کنٹرول ہوگا۔
اسکائی ڈرائیو نامی جاپانی کمپنی نے 2023 تک فلائنگ کار ٹرانسپورٹ سروس شروع ہونے کی امید ظاہر کی ہے۔
