The news is by your side.

Advertisement

امیرقطر کی جانب سے پاکستان حکومت اور عوام کیلئے نیک خواہشات کا اظہار

اسلام آباد : قطری سفیر شیخ سعود بن عبدالرحمن الثانی نے وزیر خارجہ شاہ محمود قریشی سے ملاقات میں امیرقطر کی جانب سے پاکستان حکومت اور عوام کیلئے نیک خواہشات کا اظہار کیا۔

تفصیلات کے وزیر خارجہ شاہ محمود قریشی سے قطر کے نو تعنیات سفیر شیخ سعود بن عبدالرحمن الثانی کی وزارت خارجہ میں ملاقات ہوئی، ملاقات میں دو طرفہ تعلقات،تعاون کے فروغ سمیت باہمی دلچسپی کےامورپرتبادلہ خیال کیا گیا۔

وزیر خارجہ نے قطری سفیر کو پاکستان میں ذمہ داریاں سنبھالنے پر مبارکباد دیتے ہوئے کہا پاکستان اور قطر کے مابین گہرے، دیرینہ، برادرانہ تعلقات ہیں، توقع ہے کہ آپ کی تعیناتی سے پاک قطرتعلقات مزید مستحکم ہوں گے۔

شاہ محمود قریشی کا کہنا تھا کہ خطے میں امن،استحکام، خوشحالی کے حصول کیلئے تعاون میں اضافہ ہوگا جبکہ قطری سفیر نے امیرقطر شیخ تمیم بن حماد الثانی کی جانب سے پاکستان حکومت اور عوام کیلئے نیک خواہشات کا اظہارکیا۔

یاد رہے پاکستان کے یوم آزادی پر حکومت قطر اور عوام کی جانب سے مبارکباد دی گئی تھی ، اس حوالے سے قطر کے سفیر نے اپنے پیغام میں کہا تھا کہ دونوں ملکوں کے تعاون میں وقت کے ساتھ وسعت پیدا ہوئی ہے، جس میں دونوں ممالک میں سیاسی، ثقافتی، معاشی، تجارتی اور دفاعی شعبہ جات سرفہرست ہیں۔

قطری سفیر نے اپنے پیغام میں مزید کہا تھا کہ پاکستان نے مشکل حالات اور مختلف آزمائشوں کے باوجود بہت کچھ حاصل کیا۔

Comments

یہ بھی پڑھیں