The news is by your side.

Advertisement

وزیرخارجہ شاہ محمودقریشی سے جاپان کے سفیر کی ملاقات

اسلام آباد : وزیر خارجہ شاہ محمود قریشی نے جاپانی سفیر سے ملاقات میں کہا جاپان ، کثیر جہتی شعبوں میں پاکستان کی تعمیر و ترقی میں معاونت کرتا چلا آ رہا ہے، اقتصادی تعلقات مزید مستحکم بنانے چاہئیں جبکہ جاپانی سفیر نے اپنی حکومت کی طرف سے مکمل تعاون کا یقین دلایا۔

تفصیلات کے مطابق پاکستان میں جاپان کے سفیر کونینورو مٹسودا نے وزارتِ خارجہ میں وزیر خارجہ مخدوم شاہ محمود قریشی سے ملاقات کی، جس میں پاکستان اور جاپان کے مابین دوطرفہ تعلقات سمیت اہم علاقائی اور باہمی دلچسپی کے امور پر تبادلہ خیال کیا گیا ۔

فریقین نے پاکستان اور جاپان کے مابین فروغ پاتے ہوئے، دوطرفہ تعلقات کی نوعیت پر اطمینان کا اظہار کیا ۔

وزیر خارجہ شاہ محمود قریشی نے کہاکہ پاکستان جاپان کے ساتھ اپنے دوطرفہ تعلقات کو انتہائی قدر کی نگاہ سے دیکھتا ہے، جاپان، پاکستان کا بنیادی اقتصادی شراکت دار ہے، جاپان ، کثیر جہتی شعبوں میں پاکستان کی تعمیر و ترقی میں معاونت کرتا چلا آ رہا ہے ۔

شاہ محمود قریشی نے پاکستان اور جاپان کے درمیان اقتصادی تعلقات کو مزید مستحکم بنانے پر زور دیا ۔

مزید پڑھیں : فواد چوہدری سے جاپانی سفیر کی ملاقات، ٹیکنالوجی کے شعبے میں تعاون پر بات چیت

جاپانی سفیر نے 22، 23اپریل 2019 کو جاپانی وزیر خارجہ تارو کونو کی خصوصی دعوت پر وزیر خارجہ مخدوم شاہ محمود قریشی کے متوقع دورہ جاپان کے حوالے سے بھی تبادلہ خیال کیا۔

جاپانی سفیر کا کہنا تھا وزیر خارجہ مخدوم شاہ محمود قریشی کے دورہ جاپان سے دونوں ممالک کے مابین دوطرفہ تعلقات مزید مستحکم ہوں گے اور فریقین کو دو طرفہ سیاسی، اقتصادی، تعلیمی اور ٹریننگ سمیت علاقائی اور عالمی اہمیت کے حامل، باہمی دلچسپی کے متعدد شعبوں میں تعاون کے فروغ کیلئے گفت و شنید کا موقع ملے گا ۔

جاپان کے سفیر نے باہمی دلچسپی کے امور پر وزیر خارجہ مخدوم شاہ محمود قریشی کو اپنی حکومت کی طرف سے مکمل تعاون کا یقین دلاتے ہوئے کہا ہم جاپان میں آپ کی آمد کے منتظر رہیں گے۔

Comments

comments

یہ بھی پڑھیں