استنبول : وزیر خارجہ مخدوم شاہ محمود قریشی دو روزہ سرکاری دورے پر ترکی پہنچ گئے،جہاں وہ ہارٹ آف ایشیا کانفرنس سے خطاب کریں گے۔
تفصیلات کے مطابق وزیر خارجہ شاہ محمود قریشی 2 روزہ سرکاری دورے پر ترکی پہنچ گئے، استنبول ہوائی اڈے پر ترکی میں پاکستانی سفیرسائرس سجاد قاضی نےاستقبال کیا ، اس موقع پر ترکی میں پاکستانی سفارتخانے کے سینئر حکام بھی استقبال کیلئے موجود تھے۔
وزیر خارجہ مخدوم شاہ محمود قریشی استنبول میں منعقدہ 14 ممالک کے وزراء خارجہ کے اجلاس (ہارٹ آف ایشیا) میں شرکت کریں گے اور ہارٹ آف ایشیاء استنبول عمل کانفرنس میں باہمی تعاون اور فلاحی امور کے بارے میں تبادلہ خیال کیا جائے گا۔
ترکی کے وزير خارجہ مولود چاوش اوغلو اور افغانستان کے وزیر خارجہ ادریس زمان کانفرنس کی مشترکہ صدارت کریں گے، ہارٹ آف ایشیا استنبول عمل پر مبنی پہلی کانفرنس 2011 میں استنبول میں افغانستان کے متعلق منعقد ہوئی۔
اس کانفرنس میں 14 ممالک ؛پاکستان، ترکی افغانستان، آذربائیجان، چین، ہند، ایران، قزاقستان، قرغزستان، روس، سعودی عرب ، تاجکستان ، ترکمنستان اور متحدہ عرب امارات شامل ہیں۔
وزیرخارجہ کانفرنس میں افغان امن عمل اور خطے میں امن واستحکام کیلئے پاکستان کے اقدامات سے آگاہ کریں گے جبکہ ترکی میں مقامی اورعالمی میڈیا کے نمائندگان سے بھی ملیں گے اور مختلف علاقائی اور عالمی امور پر پاکستان کے مؤقف سے آگاہ بھی کریں گے۔
