بھارت پاکستان کو الیکشن کی سیاست میں نہ لائے: دفتر خارجہ -
The news is by your side.

Advertisement

بھارت پاکستان کو الیکشن کی سیاست میں نہ لائے: دفتر خارجہ

اسلام آباد: دفتر خارجہ نے بھارتی وزیر اعظم مودی کے گجرات میں کانگریس کی فنڈنگ کے بیان کی مذمت کرتے ہوئے کہا ہے کہ بھارت پاکستان کوالیکشن کی سیاست میں نہ لائے۔

تفصیلات کے مطابق ترجمان دفتر خارجہ ڈاکٹر فیصل نے ہفتہ وار میڈیا بریفنگ میں کہا کہ پاکستان بھارتی الزامات کو بے بنیاد قرار دیتے ہوئے ان کی تردید کرتا ہے۔ ’بھارت پاکستان کو الیکشن کی سیاست میں نہ لائے، مودی یاد رکھیں الیکشن کارکردگی سے جیتے جاتے ہیں‘۔

یاد رہے کہ چند روز قبل بھارتی وزیر اعظم نریندر مودی نے الزام عائد کیا تھا کہ پاکستان بھارتی ریاست گجرات کے انتخابات پر اثر انداز ہونے کی کوشش کر رہا ہے۔ انہوں نے یہ الزام بھی عائد کیا تھا کہ پاکستان سے کچھ سرکاری افسران نے کانگریس کے لیڈران سے بھی ملاقات کی ہے۔

بھارتی وزیر اعظم کے اس الزام کو خود کانگریس نے بھی بے بنیاد قرار دیا تھا۔

ہفتہ وار بریفنگ میں ترجمان دفتر خارجہ کا مزید کہنا تھا کہ بھارت کےتوسیع پسندانہ ڈیزائن خطے کے امن کے لیے خطرناک ہیں۔

انہوں نے کہا کہ سی پیک کثیر الجہتی منصوبہ ہے، چین فنڈنگ روکنے کی تردید کر چکا ہے۔ ان کے مطابق چین نے سی پیک کے کسی پروجیکٹ کی فنڈنگ نہیں روکی۔ فنڈز کا اجرا مخصوص طریقہ کار کے ذریعے ہوتا ہے۔

ڈاکٹر فیصل نے مزید بتایا کہ اقوام متحدہ جنرل اسمبلی کی کمیٹی نے پاکستان کو رکن منتخب کرلیا ہے۔ پاکستان کو 3 سال کے لیے رکن منتخب کیا گیا ہے۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں