فوڈ اینڈ ایگریکلچر آرگنائزیشن میں کیریئر بنانے کے خواہشمند افراد کے لے بڑی خوشخبری آگئی ہے۔
بیورو آف ایمیگریشن اینڈ اورسیز ایمپلائمنٹ کے مطابق ایف اے او میں ملازمین کو عموماً دو بڑی کیٹیگریز میں رکھا جاتا ہے ایک پروفیشنل جس میں عہدے بین الاقوامی سطح پر بھرتی کیے جاتے ہیں، دوسرا جنرل سروس یہ مقامی سطح پر اسی ملک سے بھرتی کیے جاتے ہیں جہاں نوکری موجود ہو۔
اس کے علاوہ ایف اے او مخصوص منصوبوں یا قلیل مدتی ضروریات کے لیے کنسلٹنٹس، انٹرنز اور رضاکاروں کو بھی شامل کرتا ہے۔
تنخواہ اور مراعات کا نظام اقوامِ متحدہ کے مشترکہ نظام کے مطابق ہوتا ہے، جس کے تحت بنیادی تنخواہ (گریڈ اور خاندانی حیثیت کے مطابق) دی جاتی ہے، اور اس کے ساتھ ایک اضافی رقم (پوسٹ ایڈجسٹمنٹ) بھی شامل ہوتی ہے جو اس ملک کے اخراجاتِ زندگی اور کرنسی کے فرق کے مطابق ہوتی ہے۔ اس کا مقصد یہ ہوتا ہے کہ مختلف ممالک میں کام کرنے والے ملازمین کی قوتِ خرید تقریباً برابر رہے۔
یہ پڑھیں: پیدائش سے 5 سال تک کے بچوں کو 3 ہزار روپے وظیفہ دینے کا فیصلہ
زیادہ تر تنخواہیں اور الاؤنسز مقامی انکم ٹیکس سے مستثنیٰ ہوتے ہیں، جبکہ مشکل یا دور دراز علاقوں میں کام کرنے والوں کو اضافی الاؤنس بھی دیا جا سکتا ہے۔ بین الاقوامی سطح پر بھرتی ہونے والے ملازمین کے لیے ان کے اور ان کے اہلِ خانہ کے سفری اخراجات بھی ادا کیے جاتے ہیں، اور گھر کا سامان منتقل کرنے کے اخراجات بھی دیے جا سکتے ہیں۔
ملازمت کے آغاز پر ابتدائی اخراجات کے لیے ایک خصوصی گرانٹ دی جاتی ہے، جبکہ اگر رہائش مہنگی ہو تو کرایہ میں سبسڈی بھی مل سکتی ہے۔ ملازمت ختم ہونے پر بعض صورتوں میں ریپیٹری ایشن گرانٹ (واپسی کے اخراجات) بھی دی جاتی ہے۔
خاندانی سہولیات میں بچوں کے لیے تعلیمی اخراجات میں مدد شامل ہے، جو پوسٹ سیکنڈری تعلیم (یونیورسٹی) کے ابتدائی چار سال تک دی جا سکتی ہے، اور بعض اوقات تعلیمی سفر کے اخراجات بھی شامل ہوتے ہیں۔
چھٹیوں کے حوالے سے، ملازمین کو سالانہ تقریباً 30 دن کی چھٹی اور 10 سرکاری تعطیلات ملتی ہیں۔ بین الاقوامی ملازمین کو بعض صورتوں میں اپنے وطن جانے کے لیے بھی چھٹی اور سفری سہولت دی جاتی ہے۔ اسی طرح زچگی، پدری اور بچوں کو گود لینے کی صورت میں مکمل تنخواہ کے ساتھ 2 سے 16 ہفتوں تک کی چھٹیاں بھی دی جاتی ہیں۔
سوشل سکیورٹی کے طور پر، ملازمین کو ہیلتھ انشورنس، حادثات یا بیماری کی صورت میں سفری انشورنس، اور دیگر سہولیات فراہم کی جاتی ہیں۔ اگر کوئی ملازم چھ ماہ یا اس سے زیادہ عرصہ کام کرے تو وہ اقوامِ متحدہ کے پنشن فنڈ کا حصہ بن جاتا ہے، جس سے مستقبل میں ریٹائرمنٹ کے لیے مالی تحفظ ملتا ہے۔
مجموعی طور پر ایف اے او کا یہ پیکیج اچھی تنخواہ کے ساتھ مختلف مراعات فراہم کرتا ہے، جو ملازمین کی نقل و حرکت، خاندانی ضروریات اور طویل مدتی تحفظ کو یقینی بنانے کے لیے ترتیب دیا گیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں