کولون : جرمنی میں دنیا کی سب سے بڑی فوڈ اینڈ بیوریج نمائش میں پاکستانی مصنوعات کے اسٹالز نے دھوم مچا دی۔
دنیا کی معروف ترین خوراک و مشروبات کی تجارتی نمائش "اے نوگا 2025” جرمنی کے شہر کولون میں جاری ہے، جس میں پاکستان کی 54 کمپنیاں حصہ لے رہی ہیں۔
پاکستان ٹریڈ ڈیولپمنٹ اتھارٹی (ٹڈاپ) کے تعاون سے متعدد پاکستانی کمپنیاں بھی اس نمائش میں شرکت کررہی ہیں، جس کے ذریعے وہ اپنی مصنوعات کو عالمی مارکیٹ میں پیش کرنے کا بہترین موقع حاصل کرتی ہیں۔
اس حوالے سے جرمنی میں تعینات پاکستانی ٹریڈ کونسلر آمنہ نعیم کا کہنا ہے کہ ان میں سے 34کمپنیاں ٹریڈ ڈیولپمنٹ اتھارٹی آف پاکستان کے زیر اہتمام پاکستان پویلین میں اپنی مصنوعات پیش کر رہی ہیں۔
ان مصنوعات میں چاول، پروسیسڈ فوڈز، گلابی نمک، جوسز اور زراعت کے فروغ کے لیے استعمال کی جانے والی اشیاء شامل ہیں۔
آمنہ نعیم کے مطابق یہ عالمی نمائش پاکستانی برآمد کنندگان کو بین الاقوامی خریداروں سے براہِ راست کاروباری روابط استوار کرنے کا بے مثال موقع فراہم کر رہی ہے۔
پاکستان پویلین حکومت کی مارکیٹ میں تنوع لانے اور معیار میں بہتری کے عزم کا مظہر ہے۔ اے نوگا 2025 پاکستانی برآمدکنندگان کو بین الاقوامی معیار سے ہم آہنگ ہونے، طویل المدتی تجارتی شراکت داری قائم کرنے اور بالخصوص یورپی مارکیٹ میں رسائی بڑھانے کے مواقع فراہم کر رہا ہے۔
توقع ہے کہ اے نوگا 2025 میں پاکستان کی شرکت سے نمایاں تجارتی سودے اور برآمدی امکانات پیدا ہوں گے، جس سے پاکستان کے زرعی و خوراکی شعبے کو عالمی سپلائی چین میں مضبوط مقام حاصل ہوگا اور پائیدار برآمدی ترقی کو فروغ ملے گا۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں