نئے سال میں آپ کا فوڈ ریزولوشن کیا ہے؟ -
The news is by your side.

Advertisement

نئے سال میں آپ کا فوڈ ریزولوشن کیا ہے؟

سال 2019 کا آغاز ہونے جارہا ہے۔ نئے سال کا آغاز ایک امید ہوتی ہے جس میں ہم بہت سے ادھورے کام نمٹانے، اپنے آپ کو بہتر بنانے اور اپنی خامیوں کو دور کرنے کا عزم کرتے ہیں۔

نئے سال کے آغاز پر بے شمار افراد اپنی فٹنس پر کام کرنے کا بھی سوچتے ہیں۔ کچھ افراد اپنا وزن کم کرنا چاہتے ہیں، کچھ اضافہ کرنا چاہتے ہیں جبکہ کچھ اپنے جسم کو صحت مند اور سڈول بنانا چاہتے ہیں۔

کیا نئے سال میں آپ کا بھی ایسا ہی کوئی ارادہ ہے؟ تو آج ہم آپ کو بتاتے ہیں کہ نئے سال میں فٹنس کے حوالے سے آپ اپنے اہداف کیسے حاصل کرسکتے ہیں۔

اس کے لیے آپ کو کچھ باتیں ذہن میں رکھنی ہوں گی۔


صحت مند غذاؤں سے دوستی کرلیں

سب سے پہلے تو اس بات کا خیال رکھیں کہ آپ جو بھی کھائیں وہ صحت مند اور غذائیت بخش ہو۔ کم کھا کر وزن کم کرنا اور جنک فوڈ کھا کر وزن بڑھانا نہایت بے وقوفانہ خیال ہے۔

اگر آپ وزن کم کرنا چاہتے ہیں تو کھانے کی مقدار کم کرنے کے بجائے ڈائٹ میں تبدیلی کریں۔ پھلوں اور خصوصاً سبزیوں کا استعمال بڑھا دیں۔

کم کھانے سے آپ کو تھوڑی ہی دیر بعد دوبارہ بھوک لگ جائے گی یوں آپ اپنے روزمرہ معمول کے برعکس زیادہ کھانے لگیں گے اور ڈائٹنگ دھری کی دھری رہ جائے گی۔

اس کے برعکس سیر ہو کر سبزیاں، پھل، دودھ، انڈے، دالیں یا مچھلی وغیرہ کھانا آپ کے جسم کو درکار توانائی اور غذائی اجزا فراہم کرے گا اور آپ کا وزن بھی معمول پر آئے گا۔

اسی طرح وزن بڑھانے کے لیے صحت مند غذائیں ہی استعمال کریں البتہ ان کی مقدار ذرا سی بڑھا دیں۔

مزید پڑھیں: دبلے پتلے افراد اپنا وزن کیسے بڑھا سکتے ہیں


کچن میں کیا رکھنا ہے؟

اس سال اپنے کچن میں نئے برتن لانے کے بجائے اسے دالوں، گندم، سبزیوں، پھلوں، جڑی بوٹیوں اور صحت بخش تیلوں سے بھر لیں۔ یقیناً اگلے سال میں آپ کی غذائی عادات بھی بہتر ہوجائیں گی۔


گھر کے کھانے کو ترجیح دیں

کیا آپ جانتے ہیں مستقل بنیادوں پر باہر کا کھانا کھانا آپ کو کینسر سمیت بے شمار بیماریوں میں مبتلا کرسکتا ہے؟

باہر کے بنے کھانوں میں مرچ مصالحوں اور مضر صحت تیل کی بہتات ہوتی ہے۔ اس کے برعکس گھر کا بنا ہوا صاف ستھرا کھانا آپ کو امراض قلب، بلڈ پریشر اور ذیابیطس سے تحفظ فراہم کرے گا اور آپ ایک صحت مند کھانے سے لطف اندوز ہوں گے۔

چنانچہ اگلے سال کے اہداف میں باہر کے کھانے سے پرہیز اور گھر کے کھانے کی ترجیح بھی شامل کرلیں۔


ایک دن گوشت کے بغیر

وزن میں کمی یا زیادتی دونوں صورتوں میں ہفتے کا ایک دن گوشت کے بغیر گزاریں۔

گو کہ گوشت جسم کو وٹامنز، پروٹین اور آئرن تو فراہم کرتا ہے تاہم اس کا استعمال اعتدال میں کرنا چاہیئے اور ایک دن گوشت سے پرہیز اس کا نہایت بہترین طریقہ ہے۔

گوشت کی جگہ سبزیوں کی مزیدار ڈش، انڈے، دال اور پھل دن کا بہترین کھانا ثابت ہوگا۔


پانی کو مت بھولیں

ہر موسم میں پانی کا زیادہ استعمال نہ چھوڑیں۔ پانی نظام ہاضمہ کو فعال رکھتا ہے اور کھانا جلد ہضم کرنے میں مدد دیتا ہے، یہ وزن میں زیادتی یا کمی کرنے کے لیے ضروری ہے۔


پھل اور سبزیاں بہترین دوست

کیا آپ جانتے ہیں پھل اور سبزیاں ہمیں بے شمار فوائد پہنچاتی ہیں؟ یہ نہ صرف خون کے بہاؤ کو معمول پر رکھ کر امراض قلب اور بلڈ پریشر سے بچاتی ہیں بلکہ موڈ اور نفسیات پر بھی مثبت اثرات مرتب کرتی ہیں۔

پھل اور سبزیاں کھانا ڈپریشن اور ذہنی تناؤ سے بھی بچاتا ہے جبکہ جسم میں خوشی پیدا کرنے والے ہارمونز میں بھی اضافہ ہوتا ہے۔

تو اس سال ٹینشن دینے والے دوستوں سے جان چھڑائیں اور خوش رکھنے والی سبزیوں اور پھلوں سے دوستی کرلیں۔


ویٹ مشین دیکھتے رہیں

مندرجہ بالا تمام طریقوں پر عمل کرنے کے ساتھ ویٹ مشین کو بھی بار بار دیکھتے رہیں۔

جب آپ وزن میں اضافہ یا کمی کرنے کے لیے اپنی غذا کا خیال رکھیں گے اور ویٹ مشین پر اپنے وزن میں فرق دیکھیں گے تو یقیناً آپ اور بھی دل سے اپنی فوڈ ریزولوشنز پر عمل کریں گے۔

Comments

comments

یہ بھی پڑھیں