اسلام آباد: وزارت خارجہ کی 100 روزہ کارکردگی رپورٹ جاری کردی گئی ہے جس میں سعودی عرب کی طرف سے ملی معاشی مدد، پاک چین تعلقات میں بہتری، متحدہ عرب امارات سے معاہدے، کرتار پور راہداری اور دیگر اہم کامیابیوں کا ذکر شامل کیا گیا ہے۔
تفصیلات کے مطابق وزیر خارجہ شاہ محمود قریشی کی ہدایت پر وزارت خارجہ کی 100 روزہ کارکردگی رپورٹ جاری کردی گئی۔ رپورٹ میں وزیر اعظم عمران خان اور وزیر خارجہ کے بیرون ملک دوروں اور حاصل شدہ کامیابیوں کی تفصیلات شامل ہیں۔
رپورٹ میں پاکستان کا دورہ کرنے والی اہم شخصیات اور وفود کی تفصیلات بھی شامل کی گئی ہیں۔ 11 صفحات پر مشتمل رپورٹ میں علاقائی اور عالمی معاملات پر ترجیحات درج ہیں۔
وزرات خارجہ کی رپورٹ میں وزیر خارجہ کے صیربنی یاس فورم، یورپی یونین، جرمنی، جاپان، کوریا اور لیتھونیا کے اعلیٰ سطح کے وفود کے ساتھ مذاکرات کا تذکرہ بھی شامل کیا گیا ہے۔
وزیر خارجہ کے جنرل اسمبلی سے خطاب اور شنگھائی تعاون تنظیم (ایس سی او)، آسم سمٹ اور ڈی ایٹ کونسل میں پاکستان کی شرکت کی تفصیلات بھی رپورٹ میں شامل ہیں۔
رپورٹ میں سعودی عرب کی طرف سے ملی معاشی مدد، پاک چین تعلقات میں بہتری، متحدہ عرب امارات سے معاہدے، کرتار پور راہداری اور دیگر اہم کامیابیوں کا ذکر بھی شامل کیا گیا ہے۔
خیال رہے کہ پاکستان تحریک انصاف کی حکومت کے 100 روز مکمل ہوچکے ہیں۔ وزیر اعظم عمران خان 100 روزہ حکومتی کارکردگی اور حاصل کیے گئے اہداف کے بارے میں قوم کو آگاہ کریں گے۔
