اسلام آباد : امریکہ اور پاکستان کے اعلیٰ سطح وفود کے درمیان دوروزہ انسداد دہشت گردی مذاکرات چھ اور سات مارچ کو اسلام آباد میں وزارت خارجہ میں ہوئے ۔
دو روزہ اجلاس کی صدارت امریکی محکمہ خارجہ کے قائم مقام رابطہ کار برائے انسداد دہشت گردی کرسٹوفر لینڈ برگ اور پاکستان کی وزارتِ خارجہ کے ایڈیشنل سیکرٹری برائے اقوام متحدہ اور اقتصادی سفارت کاری سید حیدر شاہ نے کی۔
ترجمان دفتر خارجہ ممتاز زہرہ بلوچ کے اعلامیہ کے مطابق 2روزہ بات چیت میں کثیرالجہتی فورمز پر انسداد دہشت گردی تعاون کا جائزہ لیا گیا، مذکرات میں علاقائی انسداد دہشت گردی کے منظر نامے کا جائزہ زیر بحث رہا۔
مذکرات میں سائبر سیکورٹی اور انتہا پسندی کا مقابلہ کرنے سمیت متعدد موضوعات کا احاطہ کیا گیا، پاکستان میں امریکی امداد کے منصوبوں پر بھی تبادلہ خیال کیا گیا، انسداد منی لانڈرنگ، انصاف کے شعبے میں صلاحیتوں کے پروان پر توجہ دی گئی۔
ترجمان دفترخارجہ کے مطابق فریقین نے دہشت گردی کیخلاف صلاحیت بڑھانے میں ان منصوبوں کی اہمیت کو اجاگر کیا اور دہشت گردی کی مالی معاونت کیخلاف اپنے تجربات کا تبادلہ کیا،
فریقین نے دہشت گردی کی تمام اقسام اور مشترکہ خطرے سے نمٹنے کےعزم کا اعادہ کیا، وفود کی جانب سے مزید بات چیت جاری رکھنے اور دہشت گردی کیخلاف بہتر افہام و تفہیم پیدا کرنے پر اتفاق کیا گیا۔
