اسلام آباد : لائن آف کنٹرول پر شہری کی ہلاکت پر پاکستان نے بھارتی ناظم الامور کو دفتر خارجہ طلب کرکے شدید احتجاج کیا ہے،
تفصیلات کے مطابق ایل او سی پر سیز فائر معاہدے کی خلاف ورزی اور ایک بے گناہ شہری کے جاں بحق ہونے پر پاکستان نے بھارت سے بھرپور احتجاج کیا ہے۔
ترجمان دفترخارجہ کا کہنا ہے کہ اس موقع پر کوٹلی کے گاؤں اولی کے رہائشی کی بھارتی فوج کی فائرنگ سے ہلاکت پر احتجاج ریکارڈ کرایا۔
دفتر خارجہ کے مطابق واقعہ گزشتہ روز لائن آف کنٹرول کے نکیال سیکٹر میں پیش آیا، ایسی کارروائیاں2003کے سیزفائر مفاہمت کی صریحاً خلاف ورزی ہیں۔
دفتر خارجہ کے ترجمان نے کہا کہ معصوم شہریوں کو نشانہ بنانا انسانی وقار اور بین الاقوامی انسانی حقوق اور انسانی قوانین کے منافی ہے۔
ترجمان نے کہا کہ بھارتی افواج کو انتہائی احتیاط برتنی چاہیے، معصوم شہریوں کو نشانہ بنانا انسانی وقار،عالمی انسانی حقوق کے منافی ہے، بھارت پر زور دیا گیا ہے کہ وہ واقعے کی تحقیقات کرے اور سیز فائر مفاہمت کا احترام کرے۔
مزید پڑھیں : بھارتی فوج کی ایل او سی پر بلا اشتعال فائرنگ، شہری شہید
واضح رہے کہ پاک فوج کے شعبہ تعلقات عامہ (آئی ایس پی آر) کے مطابق گزشتہ روز بھارتی فوج نے ایل او سی کے نکیال سیکٹر میں بلا اشتعال فائرنگ کرکے شہریوں کو نشانہ بنایا، فائرنگ کے نتیجے میں کوٹلی کا 60 سالہ شہری غیاث شہید ہوگیا۔
