The news is by your side.

Advertisement

سلامتی کونسل اجلاس نے ثابت کیا کہ مسئلہ کشمیر اقوام متحدہ کی فہرست میں ہے: دفتر خارجہ

اسلام آباد: ترجمان دفتر خارجہ عائشہ فاروقی کا کہنا ہے کہ سلامتی کونسل اجلاس نے ثابت کیا کہ مسئلہ کشمیر اقوام متحدہ کی فہرست میں ہے اور مسئلے کو اقوام متحدہ کی قراردادوں کے مطابق حل کیا جانا ہے۔

تفصیلات کے مطابق ترجمان دفتر خارجہ عائشہ فاروقی نے ہفتہ وار بریفنگ کے دوران بتایا کہ 164 دن گزرنے کے بعد سلامتی کونسل نے دوسری بار کشمیر پر بات کی، بحث 1 گھنٹے سے زائد جاری رہی، تمام 15 اراکین نے حصہ لیا۔

ترجمان کا کہنا تھا کہ اراکین کی جانب سے 5 اگست کا بھارتی اقدام تناؤ میں اضافے کی وجہ قرار دیا گیا، پی فائیو اور دیگر ممالک نے مقبوضہ جموں و کشمیر کی صورتحال پر تحفظات کا اظہار کیا۔

انہوں نے کہا کہ اجلاس نے پھر ثابت کیا کہ مسئلہ کشمیر اقوام متحدہ کی فہرست میں ہے اور مسئلے کو اقوام متحدہ کی قراردادوں کے مطابق حل کیا جانا ہے۔

ترجمان کا کہنا تھا کہ وزیر خارجہ شاہ محمود قریشی نے سلامتی کونسل اور جنرل اسمبلی کے صدور سے ملاقاتیں کیں، انہوں نے واضح کیا کہ بھارت کا جارحانہ رویہ کسی مس کیلکولیشن کا سبب بن سکتا ہے۔

انہوں نے کہا کہ وزیر خارجہ نے اقوام متحدہ کے سیکریٹری جنرل انتونیو گتریس سے بھی ملاقات کی، سیکریٹری جنرل نے جنوبی ایشیا میں مذاکرات کے ذریعے امن کے فروغ کی بات کی۔

ترجمان کا مزید کہنا تھا کہ اقوام متحدہ کی سیکیورٹی کونسل اجلاس میں کشمیر کو پھر متنازعہ تسلیم کیا گیا ہے اور وادی میں کرفیو اٹھانے اور انسانی حقوق کی خلاف ورزیاں ختم کرنے پر زور دیا گیا ہے۔

fb-share-icon0
Tweet 20

Comments

comments

یہ بھی پڑھیں