اسلام آباد: ترجمان دفتر خارجہ زاہد حفیظ کا کہنا ہے کہ ازبکستان کے وزیر خارجہ کے دورہ پاکستان کے دوران انہوں نے وزیر اعظم عمران خان سے بھی ملاقات کی، وزیر اعظم نے دونوں ملکوں کے درمیان تجارتی سرگرمیاں بڑھانے پر زور دیا۔
تفصیلات کے مطابق ترجمان دفتر خارجہ زاہد حفیظ نے ہفتہ وار میڈیا بریفنگ دی، بریفنگ میں ان کا کہنا تھا کہ ازبکستان کے وزیر خارجہ نے پاکستان کا دورہ کیا، انہوں نے اپنے ہم منصب شاہ محمود قریشی سے ملاقات کی۔
ترجمان دفتر خارجہ کا کہنا تھا کہ ازبکستان کے وزیر خارجہ نے وزیر اعظم عمران خان سے بھی ملاقات کی، وزیر اعظم نے دونوں ملکوں کے درمیان تجارتی سرگرمیاں بڑھانے پر زور دیا۔
انہوں نے بتایا کہ ازبک صدر نے وزیر اعظم کو تاشقند کانفرنس میں شرکت کا پیغام بھی پہنچایا۔
خیال رہے کہ ازبکستان کے وزیر خارجہ نے آرمی چیف جنرل قمر جاوید باجوہ سے بھی ملاقات کی تھی، آرمی چیف اور ازبکستان کے وزیر خارجہ کی ملاقات میں ڈی جی آئی ایس آئی لیفٹیننٹ جنرل فیض حمید بھی موجود تھے۔
آئی ایس پی آر کے مطابق ملاقات میں خطے کی سیکیورٹی صورتحال اور افغان امن عمل پر تبادلہ خیال کیا گیا تھا۔
