لاہور :ویمن کرکٹ ٹیم کی کوچ نے بتایا ہے کہ ٹریننگ سیشن میں فزیکل فٹنس اورفیلڈنگ پربھی توجہ مرکوز کی جارہی ہے، ثنا میر پہلے ٹی 20 کےلئے دستیاب نہیں ہوں گی۔
تفصیلات کے مطابق پاکستان ویمن کرکٹ ٹیم پنجاب کے دارالحکومت لاہور کے قذافی اسٹیڈیم میں ٹریننگ سیشن جاری ہے، پاکستان ویمن کرکٹ ٹیم صبح کےسیشن میں 3گھنٹے ٹریننگ کرےگی۔
کوچ اقبال امام نے بتایا کہ ٹریننگ سیشن میں فزیکل فٹنس اورفیلڈنگ پربھی توجہ مرکوز کی جارہی ہے، بنگلا دیش ویمن کرکٹ ٹیم سہ پہر میں ٹریننگ سیشن کرے گی۔
ذرائع کا کہنا تھا کہ ٹرافی کی رونمائی بھی آج شیڈول ہےجبکہ کپتان پریس کانفرنس بھی کریں گی، پاکستان اور بنگلادیش ویمن ٹیموں کے درمیان پہلا ٹی 20 ہفتے کو کھیلا جائے گا۔
ویمنز کرکٹ سیریز 26 اگتوبر سے 4 نومبر تک جاری رہے گی، سیریز کا پہلا ٹی ٹوینٹی میچ 26 اکتوبر کو کھیلا جائے گا،شیڈول کے مطابق دوسرا ٹی ٹوینٹی میچ 28 اور تیسرا 30 اکتوبر کو قذافی اسٹیڈیم میں ہوگا۔
دونوں ٹیموں کے درمیان پہلا ایک روزہ میچ 2 نومبر اور دوسرا 4 نومبر کو ہوگا، مہمان ٹیم 23 اکتوبر کو پاکستان پہنچے گی۔
ویمن کرکٹ ٹیم کے کوچ نے بتایا کہ سابق کپتان ثنا میر 26 اکتوبر کو ٹیم جوائن کریں گی، ثنا میر ایوارڈ کی تقریب کے سلسلے میں امریکا میں ہیں ، ثنا میر پہلے ٹی 20 کےلئے دستیاب نہیں ہوں گی۔
ایشیاءسوسائٹی کی جانب سے جاری کئے گئے پیغام کے مطابق ثناء میر کا نام دیگر 5 خواتین کے ساتھ شامل ہے جنہوں نے اپنے شعبوں میں غیر معمولی صلاحیتوں کا مظاہرہ کیا ،ایوارڈ کی تقریب کا اہتمام امریکا کے شہر نیویارک میں آج کیا جارہا ہے۔
