بیجنگ: چین کے سابق صدر جیانگ زیمن انتقال کر گئے۔
تفصیلات کے مطابق چین کے سابق صدر جیانگ زیمن بدھ کو 96 برس کی عمر میں انتقال کر گئے، وہ خون کے کینسر (لیوکیمیا) کے مرض میں مبتلا تھے، اور ان کے کئی اعضا نے کام کرنا چھوڑ دیا تھا۔
جیانگ زیمن 1993 سے 2003 تک چین کے صدر رہے، ان کا انتقال رات سوا بارہ بجے آبائی شہر شنگھائی میں ہوا۔
سرکاری خبر رساں ایجنسی شنہوا نیوز کے مطابق موت کا اعلان حکمران کمیونسٹ پارٹی، پارلیمنٹ، کابینہ اور فوج کی طرف سے چینی عوام کے نام ایک خط شائع کرتے ہوئے کیا گیا۔
خط میں لکھا گیا ہے کہ یہ اعلان ’گہرے غم‘ کے ساتھ کیا جا رہا ہے، کامریڈ جیانگ زیمن کی موت ہماری پارٹی اور ہماری فوج، عوام اور تمام نسلی گروہوں کے لوگوں کے لیے ناقابلِ حساب نقصان ہے۔
خط میں سابق صدر کو ایک اعلیٰ وقار کے حامل رہنما، ایک عظیم مارکسسٹ، سیاست دان، فوجی حکمت عملی کا ماہر، سفارت کار اور ایک طویل آزمائشی کمیونسٹ جنگجو قرار دیا گیا۔
جیانگ کو 1989 میں جمہوریت کے حامی مظاہرین کے خلاف تیانمن اسکوائر کے خونی کریک ڈاؤن کے بعد چین کی حکمران کمیونسٹ پارٹی کی سربراہی کے لیے گمنامی کی حالت سے نکال کر سامنے لایا گیا تھا، اور انھوں نے ملک کو واقعے کے بعد کی سفارتی تنہائی سے باہر نکال دیا تھا، سابق صدر نے نہ صرف امریکا کے ساتھ تعلقات بلکہ بے مثال اقتصادی ترقی کی بھی نگرانی کی۔
