راولپنڈی: سابق وزیراعظم میر ظفر اللہ جمالی کو دل کا دورہ پڑنے پر اسپتال منتقل کردیا گیا۔
اے آر وائی نیوز کی رپورٹ کے مطابق سابق وزیراعظم میر ظفر اللہ جمالی کو دل کا دورہ پڑنے پر اسپتال منتقل کردیا گیا، خاندانی ذرائع کا کہنا ہے کہ ان کی حالت تشویش ناک ہے۔
خاندانی ذرائع کے مطابق ظفر اللہ جمالی کو وینٹی لیٹر پر منتقل کردیا گیا ہے، انہیں راولپنڈی کے اے ایف آئی اسپتال منتقل کیا گیا ہے۔
ظفر اللہ جمالی کے صاحبزادے میر عمر خان جمالی نے قوم سے والد کی صحت یابی کے لیے دعاؤں کی اپیل کی ہے۔
مسلم لیگ ق کے سربراہ چوہدری شجاعت حسین کا کہنا ہے کہ اللہ تعالیٰ میر ظفر اللہ جمالی کو جلد صحت یابی عطا فرمائے، چوہدری پرویز الٰہی نے بھی میر ظفر اللہ جمالی کی جلد صحت یابی کے لیے دعا کی اپیل کی۔
واضح رہے کہ ظفر اللہ جمالی پاکستان کے 15ویں وزیراعظم رہ چکے ہیں۔
ق لیگ کی جانب سے وزارت عظمیٰ کا منصب سنبھالنے والے ظفر اللہ جمالی ایک سال 7 ماہ سے زائد عرصے تک اس عہدے پر فائز رہے۔
