سابق صدرآصف زرداری کی وطن واپسی کا شیڈول جاری -
The news is by your side.

Advertisement

سابق صدرآصف زرداری کی وطن واپسی کا شیڈول جاری

کراچی : پیپلزپارٹی نے سابق صدرآصف زرداری کی وطن واپسی کا شیڈول جاری کردیا، سابق صدر جمعہ تئیس دسمبر کو کراچی پہنچیں گے ۔

تفصیلات کے مطابق پیپلزپارٹی نے سابق صدر کی وطن واپسی کا شیڈول جاری کردیا، جیالوں نے شریک چئیرمین آصف زرداری کے استقبال کی تیاریاں شروع کردیں ہیں، آصف علی زرداری تئیس دسمبر کی سہ پہر خصوصی پرواز سے کراچی پہنچیں گے۔

ائیر پورٹ سے بلاول ہاؤس تک جگہ جگہ استقبالیہ کیمپ لگائے جائیں گے، ائیر پورٹ پر جیالوں سے خطاب کے بعد سابق صدر یادگار شہداء کارساز پر حاضری دیں گے ۔

پیپلز پارٹی کے شریک چئیرمین کو ریلی کی صورت میں بلاول ہاوٴس لے جایا جائے گا، چوبیس دسمبر کو آصف زرداری پیپلزپارٹی کے ارکین اسمبلی سے بلاول ہاوٴس میں ظہرانے پر ملاقات کریں گے۔

سابق صدر آصف زرداری پچیس دسمبر کو ذوالفقار علی بھٹو اور شہید بے نظیر بھٹو کے مزار پرحاضری دیں گے جبکہ چھبیس اور ستائیس دسمبر کوبی بی کی برسی کی تقریبات میں شرکت کریں گے ۔

اٹھائیس دسمبر کو نوابشاہ میں اپنے والد کی قبر پر فاتحہ خوانی کے بعد واپس کراچی پہنچیں گے۔


مزید پڑھیں : آصف زرداری 23 دسمبر کو کراچی پہنچیں گے، بلاول بھٹو


یاد رہے گذشتہ روز پیپلز پارٹی کے چئیرمین بلاول بھٹو نے اعلان کیا تھا کہ پاکستان پیپلز پارٹی کے’ کو چیئرمین‘ اور سابق صدر آصف علی زرداری 23 دسمبر کو کراچی پہنچ رہے ہیں اور پارٹی کی سرگرمیوں میں بڑھ چڑھ کر حصہ لیں گے۔

انہوں نے اپنی جماعت کے چار مطالبات کو دہراتے ہوئے کہا کہ اگر ہمارے مطالبات نہ مانیں گے تو حکومت کے خلاف بھرپور احتجاجی مہم چلائیں گے اور آصف زرداری کی موجودگی سے اس احتجاج میں مزید تیزی آئے گی اور پارٹی ایک نئے جوش اور ولولے کے ساتھ میدان میں آئے گی۔

Comments

comments

یہ بھی پڑھیں