لندن : سابق وزیر اعظم نواز شریف نے کروز میزائل بنانے کا دعویٰ کرتے ہوئے کہا ہے کہ ہم نے امریکی میزائلوں کو دیکھ کر اپنے میزائل بنالئے۔
ان خیالات کا اظہار مسلم لیگ نواز کے رہنما و سابق وزیراعظم نواز شریف نے برطانیہ میں میڈیا سے گفتگو کرتے ہوئے کیا، انہوں نے گفتگو کے دوران قومی رازوں سے پردہ اٹھا دیا۔
سابق وزیر اعظم نواز شریف نے قومی رازوں سے پردہ ہٹا دیتے ہوئے دعویٰ کیا کہ ملک کو کروز میزائل ہم نے دئیے۔
نواز شریف نے دعویٰ کیا کہ امریکا نے جنگ کے دوران افغانستان پر میزائل داغے تھے جو بلوچستان میں گرے، ہم نے امریکی میزائلوں کو دیکھ کر اپنے میزائل بنالیے۔
واضح رہے کہ نواز شریف نے وزارت عظمیٰ کا منصب سنبھالتے ہوئے حلف اٹھایا تھا کہ بطور وزیر اعظم ریاست کے راز نہیں بتائیں گے۔
جنرل (ر) امجد شعیب کا نواز شریف کے بیان پر ردعمل
دوسری جانب جنرل (ر) امجد شعیب نے سابق وزیر اعظم کے بیان پر ردعمل دیتے ہوئے کہا کہ رازداری کا حلف اٹھایا گیا اور دوسری سرزمین پر راز فاش کیا جارہا ہے۔
امجد شعیب کا کہنا تھا کہ وزیراعظم بننے کے بعد ملک کے رازوں کا حلف اٹھایا جاتا ہے، نوازشریف کی جانب سے انتہائی غلط حرکت کی گئی ہے، وہ کریڈٹ لینے کے چکر میں رازوں سے پردہ اٹھا رہے ہیں۔
