لندن (16 اپریل 2026): پاکستانی نوجوانوں نے ایک بار پھر بین الاقوامی سطح پر ملک کا نام روشن کر دیا ہے، کیوں کہ تین پاکستانی نوجوانوں کو ’’فورٹی انڈر 40‘‘ کی عالمی فہرست میں شامل کر لیا گیا ہے۔
اس فہرست میں شامل ہونے والوں میں ظل ہما، عدنان احمد قریشی اور مہک راشد شامل ہیں، جنھیں مختلف شعبوں میں نمایاں کارکردگی پر عالمی اعزاز سے نوازا گیا ہے۔
ظل ہما کو گورننس (انتظامی امور) کی کیٹیگری میں نمایاں کارکردگی پر تسلیم کیا گیا، جب کہ عدنان قریشی کو تعلیم کے شعبے میں ان کی خدمات کے باعث فہرست میں شامل کیا گیا۔ اسی طرح مہک راشد کو ایکسپیرینشل لرننگ (تجرباتی تعلیم) کے شعبے میں ان کے کام پر اعزاز دیا گیا۔
یہ عالمی فہرست یو کے کی کمپنی زوڈس کمیونیکیشن کی جانب سے جاری کی گئی ہے، جس میں دنیا بھر کے باصلاحیت نوجوان رہنماؤں کو شامل کیا جاتا ہے۔
’’فورٹی انڈر 40‘‘ کی فہرست 2017 میں شروع کی گئی تھی، اور اب تک 40 سے زائد ممالک کے نوجوان لیڈرز کی خدمات کو عالمی سطح پر پذیرائی حاصل ہو چکی ہے۔ یہ کامیابی پاکستانی نوجوانوں کے لیے ایک اہم سنگ میل ہے اور ملک کے لیے ایک باعثِ فخر واقعہ ہے۔
