دہشت گردی کے خلاف پاکستان سمیت چارملکی فوجی اتحاد -
The news is by your side.

Advertisement

دہشت گردی کے خلاف پاکستان سمیت چارملکی فوجی اتحاد

اسلام آباد : پاکستانی فوج نے انسداد دہشت گردی کے لیے تشکیل دیئے گئے چار ملکی فوجی اتحاد کو خوش آئند قرار دیتے ہوئے کہا ہے کہ اس سے دہشت گردی کے خلاف خطے کی سطح پر کی جانے والی کوششوں کو تقویت ملے گی۔

واضح رہے کہ رواں ہفتے پاکستانی فوج کے سربراہ جنرل راحیل شریف نے چین کا دورہ کیا تھا جہاں دہشت گردی کے خلاف اتحاد کا اعلان کیا گیا جس میں چین، افغانستان، تاجکستان اور پاکستان شامل ہیں۔

اس موقع پرافغان نیشنل آرمی کے جنرل قدم شاہ شمیم، چین کے جنرل فینگ فنگہوئی، پاکستانی فوج کے سربراہ جنرل راحیل شریف اور تاجکستان کی طرف سےاول نائب وزیر دفاع میجر جرنل ای اے گوبدرزودا شریک تھے۔

پاکستان کے سرکاری میڈیا کے مطابق فوج کے ترجمان لفٹیننٹ جنرل عاصم سلیم باجوہ نے کہا ہے کہ چار ملکی اتحاد نے دہشت گردوں کے مالی وسائل روکنے کے طریقہ کار کے علاوہ خطے سے دہشت گردی کے خاتمے کے لیے بھی اقدامات کا فیصلہ کیا ہے۔

اُنھوں نے مزید کہا کہ چاروں ممالک نے دہشت گردی کے خاتمے کے لیے مربوط رابطوں، کارروائیوں اور فورسز کی تربیت پر اتفاق کیا ہے۔

واضح رہے کہ پاکستان اور افغانستان کو تو بدترین دہشت گردی کا سامنا رہا ہے تاہم چین کو بھی اپنے مغربی علاقے سنکیانگ میں ایسے ہی خطرات کا سامنا ہے۔

دوسری جانب امریکی محکمہ خارجہ کے ترجمان مارک ٹونر سے روزانہ کی نیوز بریفنگ میں دہشت گردی کے خلاف چار ملکی فوجی اتحاد کی تشکیل سے متعلق ردعمل جاننے کے لیے سوال پوچھا گیا تو انھوں نے جواب دیا کہ وہ اس اتحاد کو غیر مفید نہیں سمجھتے۔

Comments

comments

یہ بھی پڑھیں