(16 مئی 2026): فرانس کے شینگن ویزا کیلیے درکار بینک بیلنس سے متعلق اہم اپ ڈیٹ سامنے آئی ہے جو درخواست کی منظوری میں اہم کردار ادا کرتی ہے۔
وہ پاکستانی شہری جو فرانس کا شینگن ویزا حاصل کرنے کی منصوبہ بندی کر رہے ہیں انہیں اپنے بینک اسٹیٹمنٹ کو بہت احتیاط سے تیار کر کے جمع کروانا چاہیے۔
یہ بھی پڑھیں: پاکستانیوں کیلیے آسٹریلیا میں نوکری اور مستقل رہائش کا سنہری موقع
ویزا کیلیے درخواست گزاروں کو اسلام آباد میں قائم فرانسیسی سفارت خانے میں درخواست دینا ہوگی جسے بینک اسٹیٹمنٹ سمیت تمام معاون دستاویزات کا جائزہ لینے کے بعد ویزا جاری کرنے یا نہ کرنے کا حتمی فیصلہ کرنے کا پورا اختیار حاصل ہے۔
پاکستانی شہریوں کو چاہیے کہ وہ روانگی کی تاریخ سے کافی وقت پہلے ویزا کی درخواستیں جمع کروائیں کیونکہ سفارت خانے میں انٹرویو کے بعد ویزے کے عمل کو مکمل ہونے میں عام طور پر 15 سے 20 دن لگتے ہیں۔
ضروری دستاویزات:
- دورے کی تصدیق یا کوئی بھی ایسی دستاویز جس میں آپ کے سفر کا طے شدہ شیڈول واضح ہو
- واپسی کے ٹکٹ کا ثبوت یا سفر کا مکمل شیڈول
- ملازمت کا معاہدہ جس میں دورے کی مدت، تاریخیں اور مقصد لکھا ہو یا گزشتہ دو سالوں کا ٹیکس ریٹرن
- گزشتہ چھ ماہ کا بینک اسٹیٹمنٹ، گزشتہ تین ماہ کی سیلری سلپس یا پینشن سرٹیفکیٹ
- ہوٹل کی بکنگ، کرایہ نامہ یا کسی نجی میزبان کی طرف سے دعوت نامہ
- تمام شینگن ممالک کیلیے قابلِ قبول انشورنس سرٹیفکیٹ
کم از کم بینک بیلنس
درخواست گزار کیلیے یہ ثابت کرنا لازمی ہے کہ اس کے پاس سفر کے اخراجات پورے کرنے کیلیے کافی فنڈز موجود ہیں۔ اگرچہ کم از کم بیلنس کی کوئی مقررہ حد نہیں لیکن فرانسیسی حکام عام طور پر یہ توقع کرتے ہیں کہ اگر مسافر ہوٹل میں ٹھہر رہا ہو تو اس کے پاس روزانہ تقریباً 120 یورو ہونے چاہئیں۔
دوسری طرف اگر پہلے سے بک کی گئی رہائش استعمال کر رہے ہوں یا کسی میزبان کے پاس ٹھہر رہے ہوں تو یہ رقم 65 سے 110 یورو روزانہ کے درمیان ہونی چاہیے۔
اس کا مطلب یہ ہے کہ اگر آپ ہوٹل میں رہائش کے ساتھ وہاں 90 دن تک قیام کا ارادہ رکھتے ہیں تو آپ کے بینک اکاؤنٹ میں 10 ہزار 800 یورو کے برابر رقم ہونی چاہیے۔
ایک یورو 342 پاکستانی روپے کے برابر ہے، اس حساب سے اگر آپ کا فرانس میں قیام 90 دنوں کا ہے تو بینک اکاؤنٹ میں 35 لاکھ روپے سے زیادہ کی رقم کا ہونا ضروری ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں