کراچی (05 اکتوبر 2025): ایف آئی اے اور بین الاقوامی تنظیم آئی سی ایم پی ڈی کے اشتراک سے اسلام آباد میں 2 روزہ مشاورتی ورکشاپ کا انعقاد ہوا، یہ ورکشاپ ’ایف جے اے – پاک‘ (پاکستان میں نوکری کے جعلی اشتہارات روکنے کے) منصوبے کے تحت کیا گیا۔
ایف جے اے – پاک منصوبہ ناروے ڈائریکٹوریٹ آف امیگریشن کی مالی معاونت سے جاری ہے، اس ورکشاپ کا مقصد جعلی نوکری کے اشتہارات اور سائبر سرگرمیوں کے خطرات سے آگاہی فراہم کرنا تھا۔
ورکشاپ میں وزارت داخلہ، ایف آئی اے، اوورسیز ایمپلائمنٹ کارپوریشن، بی او ای ای، نیشنل پولیس بیورو، پی ٹی اے اور پی کے سرٹ کے نمائندوں نے شرکت کی، ورکشاپ میں محفوظ اور باخبر ہجرت کے راستوں کو اجاگر کیا گیا۔
ورکشاپ کے دوران اسٹیک ہولڈرز سے آگاہی مہم پر رائے اور تجاویز لی گئیں، جعلی جاب اشتہارات کی روک تھام کے لیے موجودہ آگاہی کوششوں کا تفصیلی جائزہ لیا گیا، قومی سطح پر آگاہی مہم کے لیے عملی اقدامات اور حکمت عملی پر اتفاق کیا گیا۔
ورکشاپ میں نیشنل پلان آف ایکشن برائے آگاہی کی تشکیل کے لیے سفارشات کو حتمی شکل دی گئی، اس آگاہی مہم کا مقصد غیر قانونی ہجرت اور انسانی اسمگلنگ کے خطرات سے نوجوانوں کو محفوظ رکھنا ہے۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں