پیرس : فرانسیسی عدالت نے سات سال قبل ایک سعودی شہزادے کے کارواں پر مسلح ڈکیتی کرنے والے چھ ملزمان کو جرم ثابت ہونے کے بعد قید کی سزا کا حکم سنا دیا۔
سعودی ذرائع ابلاغ نے فرانسیسی خبر رساں ادارے کے حوالے سے کہا ہے کہ پیرس کی کرمنل کورٹ نے سال 2014 میں سعودی شہزادے کے کارواں پر مسلح ڈکیتی میں ملوث چھ افراد کو تین سے سات برس تک کی قید کی سزا سنادی جبکہ مقدمے میں شامل ساتویں ملزم کو مقدمے سے بری کردیا۔
ذرائع ابلاغ کے مطابق اگست 2014 میں سعودی شہزادے کے کاروان پر اس وقت مسلح افراد نے حملہ کیا جب وہ اپنے ہوٹل سے نکل کر ایئرپورٹ کی جانب رواں تھے۔ شہزادے کا کارروان 10 گاڑیوں پر مشتمل تھا۔
نقاب پوش مسلح حملہ آور جو دو مسروقہ گاڑیوں میں سوار تھے نے کارواں کی پہلی گاڑی کو زبردستی روکا اور اس میں سوار افراد کو اسلحہ کے زور پر اتارکر یرغمال بنالیا۔
ملزمان دو لاکھ 50 ہزار یورو، تین لاکھ ڈالر کے علاوہ قیمتی گھڑیاں اور زیورات لوٹ کر موقع واردات سے فرار ہو گئے تھے تاہم مسلح افراد نے کسی پر گولی نہیں چلائی تھی۔
مقدمے کی سماعت کے موقع پر عدالت نے ملزمان پر جرم ثابت ہونے کے بعد گروہ کے چھ ارکان کو قید کی سزا کا حکم دے دیا۔
