فرانس کے اسٹار فٹبالر اور سعودی الاتحاد کلب کے اہم رکن کریم بنزما بھی غزہ کے مظلوم فلسطینیوں کی آواز بن گئے اور ان کی حمایت میں ٹویٹ کر دی۔
غاصب صہیونی ریاست اسرائیل کی جانب سے غزہ کے مظلوم مسلمانوں کے خلاف بربریت کا سلسلہ جاری ہے۔ گیارہ روز سے مسلسل جاری فضائی حملوں میں 2900 سے زائد فلسطینی شہید ہوچکے ہیں جن میں سے نصف سے زائد تعداد بچوں اور خواتین کی شامل ہے جب کہ زخمیوں کی تعداد 10 ہزار سے تجاوز کر چکی ہے۔
اسرائیل کے اس انسانیت سوز مظالم پر دنیا بھر میں انسانیت کا درد رکھنے والے مختلف شعبہ ہائے زندگی سے تعلق رکھنے والے افراد آواز حق بلند کر رہے ہیں جن میں نیا اضافہ فرانس کے اسٹار فٹبالر اور سعودی الاتحاد کلب کے رکن کریم بنزما کا ہے جنہوں نے غزہ پٹی کے مظلوم مسلمانوں کی حمایت میں ٹویٹ کیا ہے۔
کریم بنزما نے سماجی رابطوں کی ویب سائٹ ایکس پر اپنے ٹویٹ میں لکھا ہے کہ غزہ کے باشندے اسرائیل کی بمباری کا ہدف بن رہے ہیں۔
فرانسیسی فٹبالر نے مزید لکھا کہ ہماری تمام دعائیں غزہ کے ان باشندوں کے لیے ہیں جو ایک بار پھر اسرائیل کی ظالمانہ بمباری کا نشانہ بن رہے ہیں جس میں خواتین اور بچوں کو بھی نہیں چھوڑا گیا۔
Toutes nos prières pour les habitants de Gaza victimes une fois de plus de ces bombardements injustes qui n’épargnent ni femmes ni enfants.
— Karim Benzema (@Benzema) October 15, 2023
واضح رہے کہ غزہ پر اسرائیل کی حالیہ فضائی حملے اب تک کی سب سے شدید بمباری ہے۔ اسرائیل نے 23 لاکھ فلسطینیوں کے گھروں کو مکمل طور پر محاصرے میں لے رکھا ہے اور علاقے کا بڑا حصہ تباہ کر دیا ہے۔
