The news is by your side.

Advertisement

فیس بک پر دوستی کا انتہائی بھیانک انجام

خان پور :فیس بک کی دوستی نے ایک اور نوجوان کی جان لے لی ، پولیس نے ملزم اور اس کے ساتھیوں کو گرفتار کرکے مقتول کی لاش برآمد کر لی ہے۔

تفصیلات کے مطابق فیس بک پر دوستی کا انتہائی بھیانک انجام سامنے آ یا، چشتیاں کے رہائشی نوجوان ریحان بھٹی کی فیس بک کے ذریعے خان پور کے چک 2 پی کے ماسٹر عابد نامی مقامی زمیندار سے دوستی ہوئی تو وہ دوست سے ملنے خان پور چلا آیا۔

جہاں پر نامعلوم وجوہات کی بنا پر ماسٹر عابد نے گولی مار کر ریحان بھٹی کو قتل کر دیا اور ساتھیوں کے ہمراہ لاش اپنے ڈیرہ پر دفنا دی۔

اس واقعہ کی اطلاع پر صدر پولیس کے ایس ایچ او سیف اللہ خان کورائی نے اپنی پیشہ ورانہ مہارت کو استعمال کرتے ہوئے اطلاع ملنے کے محض چند گھنٹوں کے اندر ہی قاتل کو اس کے 3 ساتھیوں سمیت گرفتار کر کے ملزمان کی نشاندہی پر مقتول کی لاش برآمد کر لی۔

بہترین اور فوری کاروائی پر مقتول کے ورثاء اور شہری حلقوں کی جانب سے پولیس کی کارکردگی کو خوب سراہا گیا۔

یاد رہے رواں ماہ پنجاب کے دارالحکومت لاہور میں صبا نامی خاتون نے فیس بک کی مدد سے گھر میں داخل ہونے والے دو ڈاکوؤں کو پولیس کے ہاتھوں گرفتار کروایا تھا۔

لاہور کے علاقے تھانہ فیصل ٹاؤن کی حدود میں واقع گھر میں دو ڈاکو لوٹ مار کی نیت سے داخل ہوئے، گھر میں موجود صبا نامی خاتون بالائی منزل پر موجود تھیں تو اسی دوران انہوں نے اہل خانہ کی ڈاکوؤں سے مزاحمت کی آوازیں سُنیں تو خاتون نے اپنے کمرے کا دروازہ بند کر کے فیس بک پر اسٹیٹس شیئر کیا کہ ’میرے گھر میں ڈاکو داخل ہوگئے ہیں‘۔

صبا کے دوستوں اور دیگر عزیز و اقارب نے پوسٹ پڑھ کر پولیس کو بذریعہ ہیلپ لائن واقعے سے متعلق آگاہ کیا ، جس کے بعد تھانہ فیصل ٹاؤن کی بھاری نفری جائے وقوعہ پر پہنچی اور مکان کو گھیرے میں لے لیا اور آدھے گھنٹے مذاکرات کے بعد دونوں ڈاکوؤں کو گرفتار کر کے مقدمہ درج کرلیا۔

Comments

یہ بھی پڑھیں