اسلام آباد: ڈرائیونگ لائسنس بنوانے والوں کو ڈیڈ لائن دے دی گئی اور سخت کارروائی کا اعلان کردیا گیا۔
تفصیلات کے مطابق اسلام آباد میں ٹریفک پولیس نے شہریوں کو 1 اکتوبر تک ڈرائیونگ لائسنس حاصل کرنے کی ڈیڈ لائن دے دی۔
چیف ٹریفک آفیسر کیپٹن (ر) حمزہ ہمایوں نے واضح کیا کہ مقررہ تاریخ کے بعد لائسنس کے بغیر گاڑی یا موٹرسائیکل چلانے والوں کے خلاف سخت قانونی کارروائی کی جائے گی۔
کیپٹن (ر) حمزہ ہمایوں کا کہنا تھا کہ بغیر لائسنس ڈرائیونگ کرنے والے شہریوں کے خلاف مقدمہ درج ہوگا، گرفتاری عمل میں لائی جائے گی اور گاڑی بھی بند کی جائے گی۔
چیف ٹریفک آفیسر نے مزید کہا کہ یہ کارروائی بلاتفریق ہوگی اور کسی بھی طبقے سے تعلق رکھنے والے شہری کو رعایت نہیں دی جائے گی۔
مزید پڑھیں : ڈرائیونگ لائسنس کے بغیر گاڑی چلانے والوں کے خلاف پولیس کا بڑا فیصلہ
اسلام آباد ٹریفک پولیس نے شہریوں کی سہولت کے لیے فیض آباد ٹریفک آفس، ایف-6 سہولت مرکز اور ٹریفک سہولت وینز کے ذریعے لائسنس کے حصول کا انتظام کیا ہے۔
شہریوں کو ہدایت کی گئی ہے کہ وہ ہمیشہ اپنے ساتھ لائسنس کی فزیکل کاپی رکھیں، کیونکہ ڈیجیٹل کاپی کسی صورت قابل قبول نہیں ہوگی۔
کیپٹن (ر) حمزہ ہمایوں نے کہا کہ شہری مہذب قوم ہونے کا ثبوت دیں، ڈرائیونگ لائسنس حاصل کریں اور قانونی کارروائی سے بچیں۔
ان کا مزید کہنا تھا کہ بغیر لائسنس ڈرائیونگ نہ صرف قانون کی خلاف ورزی ہے بلکہ یہ اپنی اور دوسروں کی جان کے لیے بھی خطرناک ہے۔
