The news is by your side.

سوشل میڈیا پر انتہائی مطلوب افراد کی فہرست میں نام نہ پاکر مفرور نے بڑی حماقت کر دی

جارجیا: امریکا میں ایک مفرور ملزم کو اس کی ایک حماقت کی وجہ سے گرفتار کر لیا گیا، ملزم نے سوشل میڈیا پر انتہائی مطلوب افراد کی فہرست میں اپنا نام نہ پاکر اس پر کمنٹ کر دیا تھا۔

تفصیلات کے مطابق سوشل میڈیا پر پولیس کی جانب سے شیئر ہونے والی انتہائی مطلوب افراد کی فہرست میں اپنا نام نہ پا کر ایک مفرور ملزم کرسٹوفر اسپالڈنگ نے اس پر تبصرہ کر کے پولیس کو اپنی جانب متوجہ کر لیا۔

یہ دل چسپ واقعہ امریکی ریاست جارجیا کی راکڈیل کاؤنٹی میں اس وقت پیش آیا جب پولیس نے انتہائی مطلوب افراد کی فہرست شیئر کی، جن میں قتل، ڈکیتی، اقدام قتل اور اغوا کے مفرور ملزمان کے نام شامل تھے۔

کرسٹوفر اسپالڈنگ نامی مفرور ملزم نے پوسٹ پر کمنٹ کیا ’میرے بارے میں کیا خیال ہے؟‘

ملزم کے اس کمنٹ پر کاؤنٹی پولیس نے جواب دیا ’آپ بالکل درست کہہ رہے ہیں، آپ کے خلاف دو وارنٹس ہیں، راستے میں ہیں۔‘

کاؤنٹی پولیس نے یہ وضاحت بھی کی کہ ٹاپ ٹین کی یہ فہرست دراصل الزامات کی شدت کی بنیاد مرتب کی گئی ہے، اور اس فہرست میں شامل نہ ہونے کا مطلب یہ نہیں ہے کہ اگر آپ کے پاس ایکٹیو وارنٹ ہے تو ہمارا مفرور یونٹ آپ کو تلاش نہیں کر رہا ہے۔

کرسٹوفر کی جانب سے کمنٹ کے ایک روز بعد پولیس نے اس کو گرفتار کر لیا۔ فیس بک پر پوسٹ کرتے ہوئے محکمہ پولیس نے ملزم کا شکریہ بھی ادا کیا کہ خود اس کے تعاون سے یہ گرفتاری عمل میں آئی۔

Comments

یہ بھی پڑھیں